Getxoko Kultur Etxeak dei berezia egin die udalerriko biztanleei etxean dituzten argazkiak partekatzeko: "Getxoko argazkien artxiboan partikularrek eginiko ekarpenak eta dohaintzak daude. Nahi duenak San Nikolas Plazako liburutegian eman ditzake argazkiak. Bertan, kopia digitalizatua egingo dugu eta originala itzuliko dizugu". Izan ere, auzokideek egindako aportazioei esker, argazki-artxiboa, sortu zenetik, apurka-apurka hazi da eta gaur egun 8.000 argazkitik gora dauzka.
Baina, bestalde, argazkiak uzteaz gain, ikerketan ere laguntzea eskatu dute artxiboko arduradunek: "getxoztarren laguntza ezinbestekoa da erakusketako argazkietan ageri diren pertsonak eta lekuak identifikatzeko. Horretarako, erakusketan koaderno bat jarriko dugu. Bertan, jendeak informazioa eman dezake, datak zehaztu, pertsonak identifikatu, eta abar".
Getxo udalerriko antzinako argazkiak erakutsiko dituzte datorren astean Areetan
Datorren astean zehar, hilaren 10etik 16ra, Areetako Xake plazak “Fotorretro Getxo 2007” argazki erakusketa hartuko du. Bertan 200 bat argazki egongo dira ikusgai, Algortako San Nikolas liburutegiko bildumatik hartuak. Ohi bezala, sarrera doakoa izango da eta ordutegia honako hau: 11:00etatik 14:00etara / 17:00etatik 21:00etara. Getxoko Kultur Etxeak jakinarazi duenez, astelehenean, prestaketa lanak direla eta, erakusketa arratsaldez baino ez da irekiko. Argazki horietan, bisitariak Getxo udalerria eta getxoztarrak aro ezberdinetan ezagutuko ditu: XX. mendeko lehen urteetatik gure egunetara arte. Oraingo honetan Areeta eta Itzubaltzeta / Romo herrietako argazkiek eta argazki-artxiboaren bildumari eginiko azken ekarpenek protagonismo berezia izango dute. Argazkian, Plentzia-Bilbo trenbideko behargin batzuk Ezekiel Agirre lokomotoraren ondoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun