100. irratsaioa egin eta ospatuko du gauean Irratia.com-ek
2007ko abe. 5a, 16:32
Gaur gaueko 10:00etatik aurrera, Bilbo Hiria irratiko estudioetatik jaitsi eta Bilboko Kafe Antzokiaren oholtzaren gainean egingo du bere 100. saioa irratia.com-ek, Euskal Herriko lehen irrati digitala eta gainera euskalduna. Keith Johnsonen artikulua eta 17.000 lagunek bidalitako erantzuna oraindik gogoan, ezinbestez "euskal artzai digitalen topaketa" izena jarri diote ospakizunari, Irratia.com-eko lagunek bideogintzan egindako lehenengo sarraldian ikus daitekeenez. Gaurko saiorako, "elkarrizketatuak, bideoak, zuzeneko musika, antzerkia eta giro ona" agindu Jabi Zabala Irratia.com-eko gorlizko kideak. Ostean "BURP Bilbo Underground Report" bideo ikusgarria estreinatuko da "eta ondoren Ibon eta Ekaitz gure teknikariak arituko dira DJ lanetan".100 programen marka horren atzean, bi kazetariren lan neketsua dago, zazpi urtetan zehar Jabi Zabala gorliztarrak eta Patxi Gaztelumendi larrabetzuarrak egindakoa, azken garaian Ibon Burgoak eta Ekaitz Hernandezek egindako etengabeko ekarpenekin batera. Proiektua 2000. urteko azaroan abiatu zuten Bilboko Tas Tas irrati libreko estudiotik, horretarako Interneta jarri behar izan zutela irratian. Lehenengo elkarrizketa telefonoz egin zioten Fermin Muguruzari, "FM 99/00 Dub Manifest" diskoa aurkezteko. Asteazkeneroko "Jalgi hadi dantzarat!" Irratsaioak grabatu eta gero etxetik sareratzen ibili ziren Zabala eta Gaztelumendi hainbat denbora, baina maiztasunari ezin heldu ibili ostean, Bilbo Hiria irrati euskaldunerako jauzia egin zuten. Bertan gustura ibili dira eta orain dela gutxi 97. saioa egin dute animoz beterik: "hasierako ilusio bera edo handiago daukagu". Abenduaren 5eko saioa, 22:00etatik aurrera, beraz, ez da edonolakoa izango: "100. saioa egingo dugu Bilboko Kafe Antzokitik. Bai, ondo ulertu duzue, 7. solairuko estudiotik behera goaz. Antzokian egingo dugu, jendaurrean, jendearekin, gonbidatuekin, musikariekin, giro onean. Eta zu ere gonbidatu gura zaitugu, zelan ez".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun