Conchi Azkorra ASPACE elkarteko buruak eta Pablo Garcia Tejerina elkarte horretako boluntarioak jaso dituzte urteko boluntarioen sariak, Udal Gizarte Zerbitzuekin elkarlanean, Getxo udalerriko Boluntariotza Erakundeen Federazioak (FEGEVOL) antolatutako Getxoko Boluntarioen XIV. Topaketan atzo jakitera eman zutenez. Era berean, udalerriko emakumezkoen zazpi elkartek urteko elkarte boluntarioen saria jaso dute, horiek guztiek egindako lana goraipatzeko. Elkarteak Alboa, Andrak, Bilgune Feminista, Eskuz-Esku, Etxekin, Gizatiar eta Roda dira. Izan ere, atzoko topaketan emakumezkoen elkarte horien artean, bakoitzak bere esparruan aurrera eramaten ari den lana goraipatu nahi izan zuten, "emakumezkoen alorrean eta jendartean gertatu diren aldaketen alde egindakoa alegia", tokiko iturrien arabera. Argazkian, azaroaren 25ean, Algortako Bilgune Feministak deituta egindako elkarretaratzea.
Pablo Garcia Tejerinak 28 urte ditu eta hamar daramatza ASPACE elkartearekin elkarlanean, batez ere aisialdi alorrean. Sariak gazte baten lan boluntarioa goraipatu nahi du. Bestalde, buru paralisisak jota dauden pertsonak artatzen dituen ASPACE elkarteko burua da Contxi Azkorra. Elkartearen sortzailetako bat da eta sariak bere lan guztia goraipatu nahi du oso une latzak bizitzen ari den egun hauetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun