Astelehenean zine solidarioaren astea abiatuko du EHUko %0,7 Fondoak campusean

"Munduaren beste aurpegia" lelopean, zine solidarioaren astea hasiko da astelehenean, abenduak 10, arratsaldeko 4:00etan, Leioa eta Erandioko campuseko Liburutegi Nagusiko hitzaldi aretoan. Ostegunera arte luzatuko den ziklo horren bidez, Nazio Batuek 1948ko abenduaren 10ean onartu zuen Giza Eskubideen aldarrikapenaren 59. urteurrena ospatu gura du ekimenaren antolatzailea den EHU %0,7 Fondoak. Zine solidarioaren astean pelikulak eta dokumentalak emango dira. Guztietan herrialde txirotutako biztanleek jasotzen dituzten miseria eta esplotazio egoerak agertzen dira. Filmak ikusi eta gero hizketaldiak egongo dira. Lehenengo egunean, Marta Saloña EHUko irakasle eta %0,7 Fondoko partaideak aurkezpenak egin ostean 2004an Hubert Sauper-rek zuzendutako "La pesadilla de Darwin" filmari (argazkian, filamren irudi bat) utziko dio lekua. Pelikulan, Victoria lakuan Niloko perkak sortutako kaosa azaltzen da. Jardunaldietarako sarrera doakoa izango da eta EHUko ikasleek aukera askeko kreditu bat jaso ahal izango dute, gaur izen-deiturak, Espainiako Nortasun Agiriaren zenbakia, lizentziatura eta telefonoa marta.macho[abildua]ehu.es posta elektronikora bidaliz gero.