Sopelako Munarrikolanda mendi taldeak irteera berria antolatu du abenduaren 16rako, igandearekin. Oraingoan, Urkiolako Natur Parkea zeharkatzea proposatzen dute, Baltzolako kobak eta Eskuagatx mendilerroa barne hartuz. Zeharkaldia Dimako Indusi auzoan hasiko dute. Lehenik eta behin, Baltzolako kobetara hurbilduko dira, Jentilzubi ospetsua ezagutzeko. Mendi martxak San Lorentzo baselizatik jarraituko du Olarreta mendixkaraino, hortik Ezkoagako landetara helduko dira, non elur zulo bat bisitatuko duten, Dima haranaren ikuspegiaz gozatzen duten bitartean. Gertuko aterpe batean atsedena hartu ostean, Errialtabaso mendi tontorreraino (1.018 metro) jarraituko dute. Eskuagatx mendilerroko gailur altuena da eta Anboto mendikatea ikusteko aukera dago hortik. Iturriotz mendixkara heltzeko mendilerro txiki bat zeharkatuko dute. Azkenik, Saibira igoko dute Urkiolako portuan bukatzeko. Ibilbidea, gutxi gorabehera, 6 edo 7 ordu bitartekoa izango da. Autobusa goizeko 7:30ean irtengo da San Pedro elizaren aurrean dagoen geltokitik. Bazkideek 11 euro ordaindu beharko dute eta gainerakoek 13 euro. Argazkian, Munarrikolandako mendizaleek igaz Autzara (Nafarroa) egindako irteera.
Interesatuek taldearen web orrialdea bisitatzeko aukera dute informazio gehiago eskuratzeko, www.munarri.com, edo 696 731 662 telefono zenbakira deitu. Klubaren lokala Trokabide kalean kokatuta dago, 1. zenbakian, Sopelan. Izena emateko osteguna jarri dute, 20:00etatik 21:30era.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun