Bizkaiko kostaldeak jasaten ari den ekaitzaren eta 7 metrora heltzen diren olatuen eragina Uribe Kostara heldu da goizean. Besteak beste, Arriluzeko kaia itxi behar izan dute, eta pertsonek eta ibilgailuek debekatuta daukate hortik igarotzea, herri-lanetarako kamioiak izan ezik. Handik gertu, Getxoko Kirol Portuan, haizeak murruko porlan zatiak erauzi eta espaloian zehar zabaltzeaz gain, bertako pasealekuko zuhaitzak kaltetu ditu. Gainera, bertako hainbat lokal ureztatuta gelditu dira, Itsasoaren olatuak haietan sartu ondoren. Kalteturiko tokien artean Aquariumeko lehenengo solairua dago. Era berean, pasa den larunbatean Endeavor merkataritza-ontzia kruzeroentzako kaian porturatu behar izan zen, zeraman hainbat ontzi kubiertara erori ostean. Herbehereetako Endeavorrek 135 metro luzeran eta ia 7.700 tona ditu. Garraiatzen dituen 700 ontziek Santurtziko kaia dute helmuga. Argazkian, olatu bat Algortako Portu Zaharreko murruaren kontra apurtzen.
Bestalde, gaur, egun osoan zehar ipar haizeak indar handiz jotzen jarraituko duela diote meteorologia aurreikuspenek, baina baita iluntzean intentsitatea jaitsiko dela eta olaturik handienak 5 metrora ez direla iritsiko. Bitartean, euria eta hotza egingo ditu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun