Ibaizabalgo eskumalderako ospitala Getxo udalerrian ezarri dezaten lan egingo du PPk
2007ko abe. 10a, 21:16
Ibaizabalgo eskumalderako ospital berria Getxo udalerrian eraiki dadin lurra gordetzea aurreikusten duen proposamena aurkeztuko du laster Getxoko Udaleko PP Taldeak. Azpiegitura hori egitea Gasteizko Legebiltzarrak adostu zuen pasa den azaroaren 30eko osoko bilkuran, Juana Iturmendi legebiltzarkide popularrak egindako proposamen harira. Iturmendik ulertu zuen Urdulizen egitekoa den Sendatze Handiko Ospitale Zentroak ez zuela betetzen ekainean Osasun batzordean talde guztien artean adostutako Uribe Kostako ospitala egiteko erabakia, zentro horretan ez baitira oheak egongo. Hiruko Gobernuak berriz Urdulizko zentroa babestu zuen bertan ospitaleratzea behar ez duen kirurgia egingo baita. PSE-EEk, berriz, azaroaren 29an aurrekontu-akordioan Urdulizko zentroa defendatu zuen baina hurrengo egunean PPren proposamena bozkatu zuen, Uribe Kostarako 400 ohedun ospitala zehazten duena. Oposizioak onartutako ekimenak Urdulizkoa ordezkatzen duenetz eta Osasun Sailak zelan gauzatuko duen, berriz, ez dago argi.Dena den, Arruek goizean egindako prentsaurrekoan Getxo udalerria ospitala jasotzeko "lekurik egokiena" bezala aurkeztu du, udalerriaren biztanleri handia eta garraiobide onak ikusita. Era berean, ospital berriaren proiektua "oso garrantzitsutzat" jo du bai Getxorentzat eta baita inguruko herrientzat ere. Arrueren aburuz, "eskumaldeko udalerriok ospitale-oheen gabezi handia daukagu, edozein larrialdiren edo ospitaleratzeren aurrean Gurutzeta edo Basurtura joan beharra baitugu, eta uste dugu hori ahalik eta lasterren konpontzeko beharra dela". Toki egokitzat jo ditu bai Zubileta aldea eta baita Getxo ingurua, etorkizuneko Ibarbengoa geltokitik gertu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun