Berangoko behargin bat zauritu da gaur eguerdian elizatean beharrean zegoela izan duen lan istripua dela eta. I.U.S. 33 urteko gizonezkoa eskua harrapatu du enbor bat mugitzen ari zela, DYA elkarteak jakinarazi duenez. Elkarte horretako medikuek istripuaren lekuan bertan artatu ostean, langilea Gurutzeta ospitalera eraman dute. Berangoztarrak pronostiko erreserbatuko zauriak dituela zabaldu dute. "Lan istripu gehiagorik ez! Prekarietateak eta azpikontratazioak hil egiten dute!" lelopean, abenduak 1erako deitutako mobilizazioen harira, aurten "107 langile hil" direla gogoratu zuen LAB sindikatuak. "Kopuru hau urtez urte eta ia aldatu gabe errepikatzen zaigu Euskal Herrian: 2004an, 105; 2005ean, 112; 2006an, 129", gaineratu zuen. LABen aburuz, heriotza "gehienak" lan egoera eta baldintza prekarioekin zein azpikontratazioekin lotuta daude: "arazo estruktural baten aurrean gaude, ez behin-behineko zerbaiten aurrean". Argazkian, apirilaren 27an egindako lanuztea dela eta, LABk Algortan egindako elkarretaratzea / Koska irratia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun