Herriko tabernen etorkizuna eztabaidatzen dabil gaur Espainiako Auzitegi Gorena
Urtarrilaren 25ean bezala, uztailaren 10an, Espainiako Auzitegi Goreneko 61. areto bereziak ez zuen inolako adostasunik lortu, herriko tabernak Batasunaren ondasuna direnentz erabakitzerako orduan, horrela izanez gero Batasunaren likidazio prozesuan sartzeko. Bada, Efe albiste agentziak jakinarazitakoaren arabera, gaur goizeko 10:30ean hasi dira berriro eztabaidan aipatu aretoa osatzen duten 16 magistratuek. 2002ko apirilean agindu zuen Espainiako Auzitegi Nazionaleko 5. aretoko Baltasar Garzon epaileak 55 herriko taberna bahitzea, ordura arteko kale erasoek eragindako 24 milioi euroko diru galerak Batasunak ordain zitzan. Ordutik hona, auzia atzeratzen ibili da Garzon. Alabaina, 2006ko urriaren 23an, herriko tabernak miatzeko agindua eman zuen Auzitegi Gorenak, tartean Uribe Kosta eta Erandioko zortzi zeudela. Argazkian, Kurkudi herriko tabernan 2006ko urriaren 25ean egindako miaketaren irudi bat.
Espainiako Auzitegi Gorena ez zen hasierako 55 herriko tabernetara mugatu eta 120 establezimentu inguru arakatzea agindu zuen. Erandio, Astrabudua, Leioa, Itzubaltzeta / Erromo, Algorta, Berango, Sopela eta Urdulizko herriko tabernak 2006ko urriaren 24an eta 25ean miatu zituen Ertzaintzak. Egun horietan bildutako materiala ere kontuan hartuko du Batasuna legez kanpo utzi zuen Goreneko areto bereziak. Fiskaltzak, berriz, azaroan esan zuen Herriko tabernen eta Batasunaren arteko lotura egiaztatzeko "nahikoa froga" ez zegoela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun