Euskal Herriko Unibertsitateko (EHU) Klaustroa 2007-2008 ikasturteko lehenengo bilera egitekoa zen gaur, Leioa eta Erandioko campuseko areto nagusian. Alabaina, Juan Ignacio Perez Iglesias EHUko errektorea hitzaldia ematen ari zen unean, bertara sartu dira ehun bat ikasle, eta oholtzara igota haren jarduna eten dute, Berria.info agerkari digitalak zabaldu bezala. Errektorea oholtzatik jaitsi da eta ikasleek han jarraitu dute. Ordu laurden igaro eta ikasleek han segitzen zutela ikusita, saioa bertan behera uztea erabaki du Perez Iglesiasek, eta klaustroko kideek alde egin dute. Ondoren, beste hamar bat minutuz aula magna barruan jarraitu dute ikasleek, eta, ostean, irten eta manifestazioan joan dira Errektoretzaraino. Protesta horren bidez, Bolognako Prozesuaren kontrako jarrera agertu nahi izan dute ikasleek. Azkenaldian, ugariak izaten ari dira Bolognaren aurkako protestak unibertsitatean. Besteak beste, azaroaren amaieran, euskal unibertsitatearen alde "hitza hartzera" deitu zuen (argazkian) Euskal Herriak Bere Eskolak (EHBE). Ikasle Abertzaleek (IA), berriz, Euskal Herri mailako manifestazioa deitu dute abenduaren 20rako Erandio eta Leioako campusean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun