Makroprozesua hasi zenetik hamar urte bete direnean, "Espainiako inkisizioak ebazpena eman du: torturak, kartzela eta heriotza Euskal Herriaren nazio izaerari", salatu dute Iñigo Elkoro eta Jose Ramon Aranguren auzipetuek. Inma Berriozabal eta Jose Luis Elkoro ere egon dira beraiekin batera. Arangurenen arabera, 18/98 auzia "Euskal Herriaren" eta "herri oso baten borroka eta erabakiaren" kontrako epaiketa da. Ildo berean, abenduaren 19an publiko egingo duten sententziak "independentismoaren alderdi esanguratsuenari biziarteko zigorra" jarri diola adierazi du. Egin-en argitaletxearen kontseilari ohiak PSOE kritikatu du "EAJrekin batera bake prozesua hautsi zuelako" eta "gure eskubideak eztabaidatzea eta hasiera batean hitzartutako metodoak ukatu zituztelako". Haren ustez, "prozesua egon ala ez, PSOEren helburua euskal independentismoa zapaltzea izan da".
Euskal Herriaren ordua
"Orduz ordu bihar, egunez egun eta belaunaldiz belaunaldi milaka euskal herritar aurrez aurre" izango dituztela iragarri du Arangurenek. Horregatik, uste du bihar 12:00etatik 13:00etara egitekoa den lanuztean "milaka langile, ikasle eta erretiratu" izango direla. Azkenik, argi adierazi du zein izan behar duen euskal herritarren helburua. Haren arabera, "lurraldetasuna eta erabakitzeko eskubidea dira helmugak" eta horretarako lanuztean parte hartzeko deia egin du, "iristea baita garaipena". "Borrokatzeko garaia da, Euskal Herriaren ordua da" esanez amaitu du prentsaurrekoa.
Protesta Bilbon
Bilboko Buenos Aires kalean dagoen Justizia Jauregira sartu dira gaur 25 lagun, "Euskal Herriaren idenpendentziaren bidean lotu borrokari" leloa zeramaten hainbat kartel eskutan hartuta. Bertan, 18/98 makroprozesuaren ondorioz atxilotutako lagunen askatasuna aldarrikatu dute, besteak beste. Independentziaren aldeko leloak ere oihukatu dituzte bertan bildutakoek. Sartu eta bost minutura ordea, Ertzaintza abiatu da Justizia Jauregira eta protestan parte hartzen ari zen oro identifikatu dute. Haietako batek EHNA erakutsi dio Ertzaintzari eta horren ondorioz atxilo eraman dutela jakinarazi dute lekukoek.
Mobilizazioak eskualdean
Lanuztearekin batera hainbat mobilizazio deitu dituzte Uribe Kosta eskualdean biharko. Besteak beste, 12:00etan Areetako Xake plazan eta Leioako Boulevardean jarri dituzte hitzorduak; 19:30ean, berriz, Itzubaltzeta / Romoko Kolas plazan; eta, azkenik, 20:00etan Algortako Telletxe plazan eta, berriro ere, Leioako Boulevardean. Angela Murillo epaileak espetxeratzea agindutako 33 lagunen artean dira Paul Asensio Algortako semea eta Barrikako auzokidea eta Erandio eta Leioako campuseko irakasle Jexux Mari Zalakain.
Kalean dauden 18/98ko auziperatuek eta espetxeratutakoen senitartekoek prentsaurrekoa eman dute, gaur goizean, Donostian, euskal jendartea biharko deituta dagoen ordu beteko lanuztearekin (12:00etatik 13:00etara) bat egitera deitzeko. Dagoeneko aipatu deialdira atxikitu dira LAB, ESK, Hiru, EHNE eta EILAS sindikatuak, auzia "astakeria judiziala eta politikoa" dela salatuz. ELAk, ordea, ez du ordu beteko parorik egingo, "dei hori 18/98 Laguntza Taldetik kanpo" egin dela argudiatuta, "inorekin adostu barik". Gaurkoan, baina, "argi" utzi nahi izan dute inputatuek, "deialdia 18/98ko auzipetu guztien ekimena dela, eta ez bakar batzuena", ELAk berak zein Eusko Jaurlaritzako hainbat iturrik egindako adierazpenei erantzunez. Bestalde, Bilboko Buenos Aires kalean dagoen Justizia Jauregira sartu dira gaur 25 lagun, "Euskal Herriaren idenpendentziaren bidean lotu borrokari" leloa zeramaten hainbat kartel eskutan hartuta, Gara.net-ek zabaldu duenez. Argazkian, abenduaren 2ko Bilboko manifestazio jendetsuaren irudia, lehen aipatu agerkariak sareratutako bideotik hartuta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun