18/98ko auziperatuek eta espetxeratutakoen senitartekoek deitutako lanuzteari aise erantzun diote gaur goizean Uribe Kostan eta Erandion. Izan ere, "Euskal Herriaren eskubideen alde, egitasmo politiko guztiei aukera demokratikoa!" lelopean, dozena bat mobilizazio baino gehiago burutu dituzte eskualdeko beharginek eta ikasleek, auzia "astakeria judiziala eta politikoa" dela salatzeko. LABek, IAk eta Amnistiaren Aldeko Mugimenduak emandako datuen arabera, 150 bat ikasle eta irakasle kontzentratu dira Getxoko Aixerrota institutuko patioan; Erandion, berriz, 85 pertsona batu dira udaletxe aurrean; Leioan, ordea, manifestazioa egin dute 75 bat auzokidek; Algortan (argazkian), Areetan eta Berangon, hurrenez hurren, 45, 35 eta 10 lagun batu dira. Azkenik, lanuzteak izan dira ere Berangoko Alconza, Urdulizko Igeltxera industrialdeko Dismodel, Mecaner eta Permesa eta Leioako Vicrila enpresetan zein Gorlizko ikastetxean, besteak beste.
LAB, ESK, Hiru, EHNE eta EILAS sindikatuen, Batasuna, EAE eta EHAK alderdien zein Askatasuna eta Segi bezalako erakundeen babesarekin burutu dira goizeko lanuzteak, baina arratsaldean ere hainbat mobilizazio deituta daude. Orain arte zabaldutakoak honakoak dira: 19:30ean, Itzubaltzeta / Romoko Kolas plazan eta, 20:00etan Algortako Telletxe plazan eta Leioako Boulevardean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun