Mantxeta erabakitzear
Zero zenbakian aldizkariaren behin betiko izena erabakitzeko lehiaketa abiatu dute eta ekimen horretan barrikoztar guztiek zein inguruko udalerrien biztanleek har dezakete parte. Proposamenak aldizkaria@barrika.net posta elektronikora edo udaletxera zuzenean bidal daitezke, abenduaren 31 baino lehen. Irabazleak Barrikako jatetxe batean gozatzeko bi lagunentzat otordu bikainarekin sarituko dute.
Barrikako Udalak udal aldizkariaren zero zenbakia kaleratu du eta Udalak jakinarazi duenez, "bere orrialdeetan herriak sortzen duen informazio guztia biltzea" espero du. Aldizkaria hiru hilean behin kaleratuko da euskaraz eta gazteleraz, eta iturri ofizialen arabera "udalerrian sortzen diren berri adierazgarrienak aurkeztuko ditu, udalarenak, talde ezberdinenak eta herritarrenak, noski. Barrika osatzen duten auzoetan sortzen diren albisteen oihartzun izan nahi du, iritzi eta jakin-minak biltzen, guztioi lekua emanez: dendari, hostalari eta auzoko gazte eta helduei". Aldizkaria etxeetan eta elkarte, kultur etxe, egoitza eta udal eremu guztietan banatuko dute. Gainera, izen bila dabilen baina oraingoz "Barrika" izendatu duten udal aldizkaria Barrika.net webgunearen sostengua eta osagarria izango da. Edukiei dagokienez, hauek era askotakoak izango dira: kultura, kirolak, elkarteen atala, elkarrizketak, albiste orokorrak, udaletxeko berriak, Uribe Kosta Mankomunitateko ekimenak, eta abar luze bat, beti ere Barrikako Udalak jakinarazitakoaren arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun