Olentzerok idatzitako gutuna:
Kaixo, laguna:
Badakizu nor naizen, ezta? Horixe! Olentzero naiz, Euskal Herriko ikazkinik zaharrena. Aurten, urtero bezala, abenduaren 24ko gauean, opariak banatuko ditut Euskal Herriko etxe guztietan.
Uribe Kostan, azken ureotan, ohitura bihurtzen ari da nire istorioren bat kontatzea egun jakin batean. Aurten, bada, beste istorio polit bat kontatuko dizuete: Tartaroek madarikazio egin didate eta Maria Aristizabal petrikiloak lagunduko dit zuei opariak etxeetara eramaten. Baina, aizu!, dena ez dizut esango. Gertatuko dena entzun nahi baduzu, etorri Urdulizko kultur etxe berrira, abenduaren 14an, ostirala, arratsaldeko 6:30ean.
Nire lagunek esan didatenez, saiora joateko sarrerak aurretiaz hartu behar dira, zure herriko kultur etxean, eta Sopelan, udaletxeko hall kulturalean. A! esan diet ezer ez kobratzeko e!, eta kasu egin didate.
Gero arte lagunok
Olentzero
Olentzerok gutuna idatzi die Uribe Kostako Zerbitzu Mankomunitatea osatzen duten udalerrietako 4 eta 9 urte bitarteko haurrei, ostiral honetan, abenduak 14, haren berri izango dutela esanez. Hain zuzen ere, Maria Aristizabal izango du ikazkin zaharrari gertatutakoaren nondik norakoak neska-mutilei kontatzeko ardura. Ez al da, ba, ia-ia opariak banatu ahal izan gabe gelditu. Hori bai, bihar, arratsaldeko 6:30ean, Urdulizko kultur etxean egon nahi duen guztiak gonbidapena (dohainik beraz) aldez aurretik hartu beharko duela argi utzi du Olentzerok. Bestalde, larunbaterako, ikazkinari buruzko tailerra antolatu dute Barrikan, Pinpoil elkartearekin batera. Ekitaldia goizeko 11:30ean hasiko da udaletxean bertan. Barrikako umeek Olentzerorentzako gutun originala eta dibertigarria egiteaz gain, pin-ak eta karetak egiteko aukera izango dute. Tailerra 13:00etan bukatuko da. Argazkian, Sopelako Zipiriñeko ikastetxeko neska-mutilak harrera egiten Olentzerori.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun