Aimar Hidalgo Algortako gaztea atxilotu du Ertzaintzak gaur goizeko 7:30ak aldera, Uribe Kostako Amnistiaren Aldeko Mugimenduak Etengabe bitakoraren bidez jakinarazi duenez. Atxiloketa eta Ertzaintzaren "muntaia politiko-judizialak" salatzeko, AAMk mobilizazioa deitu du iluntzeko 20:00etan Algortako Telletxe kalean. Ertzainek Hidalgoren arrebari esandakoaren arabera, Basauriko espetxera eraman dute algortarra, errekurrituta daukan sententziaren bat betetzeko. Hidalgoren abokatuak, ordea, ez du errekurtso horren gaineko jakinarazpenik jaso. Hidalgori, Orkatz Gallastegi berangoztarrari eta Santurtziko Gaizka Gañani zazpi urte, sei hilabete eta egun bateko espetxe zigorra ezarri zieten pasa den martxoan, 2000ko abuztuaren 11n Algortan autobus bat erretzea leporatuta. Dena den, epaia ez da behin-betikoa oraingoz. Argazkian, Aimar Hidalgo 2005eko uztailean Algortan, kartzelan hamar hilabete eman ondoren.
Kasu horrengatik birritan egon da atxilotuta Hidalgo: 2004ko urriaren 20a eta 2005eko uztailaren 19a bitartean, 6.000 euroko fidantza ezarri eta ordaindu arte, eta aurtengo martxoan aste batez, epaiari errekurtsoa jarri arte. Atxiloketa 2000ko autobusaren auziarengatik dela pentsatzera eramaten duen beste datu bat da Ertzaintza Gaizka Gañan atxilotzera joan zela atzo, nahiz eta ez aurkitu. AAMk gogoratu duenez, Hidalgorekin dagoeneko Getxo udalerriko 21 preso politiko daude. Uribe Kosta eta Erandiori dagokionez, kopurua 43ra heltzen da eta Euskal Herria mailan 693raino doa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun