Auzi berean urriaren 4an Seguran eta Olabarrian (Gipuzkoa) Batasuneko beste hainbat zuzendaritzakide atzeman zituzten, eta gero espetxean sartu. Hauek (17): Imanol Iparragirre, Mikel Zubimendi, Jon Garai, Juan Kruz Aldasoro, Anjel Mari Elkano, Rufi Etxeberria, Hasier Arraiz, Ibon Arbulu, Aner Petralanda, Joseba Permach, Juan Joxe Petrikorena, Marisa Alejandro, Arantza Santesteban, Maite Fernandez de Labastida, Maite Diaz de Heredia, Joana Regeiro eta Ana Lizarralde. Orduan beste sei lagun ere atzeman zituzten, baina aske geratu ziren gero -haietatik lau, bermepean-. Egun batzuk geroago Beasainen (Gipuzkoa) Asier Imaz eta Madrilen Gorka Diaz atxilotu zituzten, eta hauek ere kartzelan dauzkate urriaren 18tik.
Beste auzi batzuk direla kausa, alderdi bereko agintaritzako kide Arnaldo Otegi ekainetik dago preso eta Joseba Alvarez urritik. Beraz, ekainetik Batasunaren 21 zuzendaritzakide sartu dituzte kartzelan.
Efe albiste agentziak polizia-iturriak aipatuta zabaldu duenez, Marije Fullaondo (argazkian / Gartxot) Batasuneko zuzendaritzakidea atxilotu dute 17:00ak baino zerbait lehenago, Espainiako Auzitegi Nazionalaren aginduz. Hedabide horrek Bizkaian atzeman dutela adierazi bai, baina ez du zehaztasun gehiagorik eman. Beranduago, atxiloketa Lezon gertatu dela aipatu du Ser irrati kateak; baina, beste hainbat komunikabidek baieztatu dutenez, Gernikan jazo da. Joan den urriaren 4an Baltasar Garzon epaileak Batasuneko Mahai Nazionalaren kontra agindutako polizia-operazioaren baitan egin dute atxiloketa, Efe agentziaren arabera. Algortakoa da Fullaondo, eta 2004ko ekainaren 13an Europako hauteskundeetan Herritarren Zerrendaren (HZ) zerrendaburua izan zen. HZ baliogabetu egin zuten Espainiako auzitegiek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun