Gaur goizeko prentsaurrekoan, Elena Coria Gizarte Zerbitzuetako zinegotziak aipatu duenez, kultur ekitaldiak antolatzeaz gain, tokiko erakundeak aldarrikapen eguna aprobetxatuko du, "Getxon herritarren integrazioa laguntzen duten tresnak zabaltzeko". Horren adibide jarri du, www.KaixoGetxo.net Interneten zazpi hizkuntzetan dagoen baliabideen gida. Hemendik aurrera, inprimaturiko bertsioa ere izango du horrek. "Bertsio berriak udalerrian bizitzea erabakitzen duten pertsonen eskubideak hobeto zaintzen lagundu nahi du. Horrela, besteak beste, errolda, osasun-laguntza eta gizarte eta umeen hezkuntza eskubideen garrantziaren gaineko informazioa ere jasoko du”, azaldu du Ekain Larrinaga Inmigrazioko Zerbitzuko teknikariak. Aleak ohiko tokietan banatuko dituzte (Gizarte Zerbitzuetan, Behargintza-Enplegu eta Tokiko Garapeneko Gunean, kultur aretoetan....); baita herritarren arretarako udal bulegoetan ere. Era berean, udalerriko mintzategi eta ziberzentroekin lan egingo dute, batez ere, "etorkinek eskura dauzkaten baliabideen berri emateko duten garrantziagatik".
Emakumeak gehiago
Udal arduradunek emandako datuen arabera, Getxo udalerriak 82.306 biztanle du eta, horietatik, 4.459 espainiar Estatutik kanpokoak dira. Talderik jendetsuena Bolibiakoa da, %28,3, eta beste datu esanguratsu bat da talde gehienetan gizonezkoak baino emakumezko gehiago etorri direla.
Gaur, abenduak 18, egiten ari den Etorkinen Nazioarteko Egunarekin bat egin du, beste urte batez, Getxoko Udalak. Gauzak horrela, hainbat ekitaldi antolatu dituzte hurrengo egunetarako. Besteak beste, bihar, 19:30ean, Ramin Bahraniren “Un cafe en cualquier esquina” izenburuko pelikula proiektatuko dute Algortako Getxo Antzokian. Filmak Pakistango rock izarra izan zen Ahmaden istorioa kontatzen du. Egun, Manhatango kafetegi batean lan egiten du. Sarrerak 2,90 eurotan egongo dira salgai. Ostiralean, berriz, “Sin papeles. No pense que esto me pasaria a mi” izeneko antzezlana ikusi ahal izango da, toki eta ordu beretsuetan. Madrilgo Lavapies auzoan gaztelera ikasten elkartzen diren jatorri desberdinetako etorkin talde bati buruz dihardu obrak. Gonbidapenak Algortako kultur etxean, Villamonten, egongo dira eskura. Argazkian, hainbat etorkin Algortako metroko kartel parean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun