Batera beharrean bi taldetan lehiatuko dira larunbatean Euskal Herriko errugbilariak
Getxo Artea taldeko zortzi jokalari deitu dituzte Euskadi eta Cote Basque Landes izeneko gizonezkoen senior errugbi selekzioek Algortako Fadura udal kiroldegian larunbat honetan, abenduak 22, jokatuko duten norgehiagokarako. 16:00etan hasiko da eta sarrera doan izango da. Europako Eskualdeen Txapelketari dagokion partida da eta Euskadiko Rugby Federakuntzak eta Eusko Jaurlaritzako Kirol Zuzendaritzak antolatu dute, Getxoko Udalaren babesarekin. Nazioarte mailakoa den kirol ikuskizuna antolatzeak udalerrirako duen garrantzia nabarmendu du, gaurko aurkezpenean, Imanol Landa alkateak. “Ipar eta Hego Euskal Herriko lagunak hurbiltzeko politiketan urrats bat gehiago izango da norgehiagoka hau, kirol txapelketa ofizialetan batera jardutea ezinezkoa baitute”. Alabaina, larunbatean Araba, Bizkaia eta Gipuzkoakoak Ipar Euskal Herrikoen aurka arituko dira eta, hortaz, Nafarroa Garaiko jokalaririk ez da izango. Argazkian, Euskal Autonomi Erkidegoko (EAE) errugbilariek hegoaldeko nafarren aurka jokatutako derbia 2006an, Ordizian.
Europako Eskualdeen Txapelketa 2001-02 denboraldian abiatu zen Errugbi Amateurreko Nazioarteko Federakuntzaren (FIRA) eskutik, eta Espainiako Estatutik autonomien arteko txapelketan sailkatutako lehen lau taldeek jokatzen dute gaur egun. Autonomi Erkidegokoa (EAE), –2006an txapeldun eta aurten hirugarren–, da txapelketa hori gehien irabazi duen selekzioa, 10 aldiz hain zuzen ere. Larunbateko partidari begira, Jose Miguel Galdos hautatzaileak aipatu du EAEko taldeak baja garrantzitsuak izango dituela aurrekaldean, “gure selekzioaren indarra nabarmen gutxituko dutenak”. Bestalde, selekziora deitutako Getxo Arteako zortzi jokalariak honako hauek dira: Daniel Rodriguez orpokatzailea, Alejandro Triviño bigarren lerrokoa, Iker Lopategi eta David Hernandez hirugarren lerrokoak, Igor Mirones mele erdilaria eta Jon Bilbao, Gorka Garate eta Imanol Monasterio hegalekoak. Cote Basque Landeseko selekzioak, bere aldetik, nazioartean izen eta maila handia du. Bere indarra nabarmendu du Galdosek, Frantziako lehiaketetako talde erdiprofesional garrantzitsuenetan izan diren jokalariak dituelako.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun