Erandio Landan arratsaldeko 6etan abiatuko da kalejiran Olentzero, abenduaren 23an, Goi Alde dantza taldearen eskutik. Hala ere, aurretik, puzgarri eta ludotekarekin gozatzeko aukera edukiko dute txikienek, Euskadi plazan. Horretarako ordua, goizez, 11:00etatik 14:00etara eta, arratsaldez, 16:00etatik 18:00etara jarri dute. Kalejiraren ostean, berriz, Potxin eta Patxin pailazoek eskainitako emanaldia izango dute ikusgai neska-mutilek. Goi Aldeko egoitzan izango da saioa, 20:00etan. Egun berean, Altzagako kaleetan zehar ere ibiliko da ikazkin zaharra, 18:00etatik aurrera, Kilkirtxu Gaztetxoak taldeak antolatuta. Abenduaren 24an, astelehena, berriro ere Altzagan (Irailaren 23a plazatik abiatuta), eta Astrabuduan izango da Olentzero; Altzaga ikastola eta Trabudu dantzari taldeen eskutik, hurrenez hurren. Biak ala biak 18:00etan irtengo dira. Horretaz gain, hilaren 26tik 29ra tailerrak, puzgarriak, eskalada-murrua, arku-tiroa, jolasak, ludoteka eta globoflexia izango dituzte neska-mutilek Altzaga kiroldegian. Ordutegia: 11:00etatik 14:00etara eta 16:30etik 19:00etara. Eta, egun horietan, antzerkia, dantza eta pailazo ikuskizunak ere egongo dira, arratsaldero, 19:30etik aurrera. Azoka zaharrean egingo dituzte saioak eta sartzeko gonbidapena beharko da, Kultura Sailean jaso ahal izango dena, 9:00etatik 14:00etara.
Urtarrilaren 2tik 5era bitartean, berriz, Astrabuduako Josu Murueta kultur etxera eta plazara aldatuko dute jolas parkea. 11:00etatik 13:00etara eta 16:30etik 19:30era egongo da zabalik. Antzerki, magia eta zine emanaldiak ere kultur aretoan egingo dituzte, 13:00etan eta 19:30ean. Altzagan bezala, sartzeko gonbidapena beharko da, Kultura Sailean jaso ahal izango dena, 9:00etatik 14:00etara.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun