Josu Rodriguez eta Txomin Gezuraga kaleratu egingo dituzte gaur, fidantzak ordainduta

Txomin Gezuraga eta Josu Rodriguez "Nekora" Uribe Kostako presoak gaur bertan kaleratzea espero da, gaur goizean haien senideek epaileek jarritako 6.000 eta 3.000 euroko fidantzak, hurrenez hurren, ordaindu ostean. Zer ordutan aterako diren Navalcarnero eta Soto del Realgo presondegitik eta Algorta eta Berangora noiz helduko diren, ordea, ez dago argi oraindik. Uribe Kostako Amnistiaren Aldeko Mugimenduak deitu du biei lehenengo harrera egitera herrietara heltzen direnean. Gezuragaren kasuan, harrera Amnistia tabernan egingo diote. Gezuraga eta Rodriguez Algortan, Getxon eta Berangon egindako sarekadan atxilotu zituzten pasa den urriaren 16an. Rodriguez erizaindegian izan dute bakartuta, “nahaste bipolarra” izeneko gaixotasuna pairatzen baitu. Bestalde, Marije Fullaondo Batasuneko mahaikidea Soto del Real espetxera bidali dute. Atzo Algortan 120 bat lagun bere askatasuna aldarrikatu zuten, bertako AAMk jakinarazi duenez.