“Orain baten batek ausardia izan beharko du Ameztiko auzotarrei azaltzeko, ke toxikoaren artean haien etxebizitzetatik atera behar izan zirela eta, hori, eraikuntza nazionalaren barrukoa zela”, azpimarratu du Imanol Landa alkateak (argazkian), astelehenean Algortako zenbait kutxazain eta aseguru-bulego baten aurka egindako erasoaren aurrean. Gabon-egunean, 19:15ak aldera, hainbat ezezagunek molotov koktelak jaurti zituzten Mapfre aseguru-etxeak Tellagorri kalean duen bulegoaren eta Amezti kaleko BBVA eta Caja Navarra eta Torreneko BBK banketxeen kutxazainen aurka. Ertzaintzak adierazitakoaren arabera, osasun-zerbitzuek emakume bat artatu behar izan zuten, kea inhalatzeagatik, eta Gurutzetako ospitalera eraman behar izan zuten. Getxoko Udalaren Bozeramaileen Batzordea atzo bildu zen kale erasoak gaitzesteko.
Landaren aburuz, “indarkeria espiral honek beste behin ere agerian uzten du, gure herriaren gehiengo osoaren borondatea mespretxatuz, suntsiketa, larderia, eta azken batez beldurtzeko politikaren alde bakarrik egiten dutenen izenaren guztiz galtzea". Alkateak gehitu duenez, “nola aldarrika daitezke eskubideak gainerako pertsonenak behin eta berriro urratuz?”. Kaltetuei ez ezik, erasoa izan ondoren ospitalera joan behar izan zutenei ere elkartasuna adierazi die Landak. Bere ustez, "suntsiketa eta indarkeriaren aldeko apustu honek ez du etorkizunik indarkeria edozein modutan, eta are gutxiago ekintza politikoaren bidez, onartzen ez duten gizartearen eta auzotarren aurrean”. Besteak beste, Mapfre eta BBKren bulegoen fatxada eta kristalak belztuta gelditu ziren erasoaren ondorioz. Caja Navarra banketxeak, berriz, kalte handiagoan jaso zituen, koktelak jaurtitzeko kristalak apurtu zituztelako, polizia iturrien arabera. Nahiz eta suhiltzaileak bertaratu, inguruan zegoen auto bat ere kalteak izan zituen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun