Soto del Realen dispertsioa salatu zutenei "mehatxu terroristak" leporatzea aztertuko dute
Aner Mimenza, Asier Tapia eta Borja Urberuaga euskal preso politikoei "hertsapen edo mehatxu terroristen delitua" leporatzea aztertzen ari dira Espainiako Auzitegi Nazionaleko Espetxe Zaintzarako Epaitegi Nagusiko Fiskaltza eta epailea, Espainiako Barne Ministerioak horrela eskatuta. Vocentoko hedabideak diren Colpisa albiste-agentziak, lehenengo eta "El Correo Español"-ek, ondoren, zabaldutakoaren arabera, hiru presoei Mercedes Gallizo Espetxe Erakundeetako zuzendariari "hiltzaile" eta "dispertsioaren arduraduna" deitzea egozten diete. Gainera, isolamenduan egoteaz gain, jarduera kolektiboetan parte hartzea ukatuko diete kontrakoa jakinarazi arte. Momentuz, Mimenzaren senideek jakinarazi dutenez, preso getxoztarrak Auzitegi Nazionaletik berririk ez du izan eta kartzelak jarritako bi falta larrien agiria baino ez du jaso, horregatik 21 egun pasa ditzakeela isolamenduan. Dena den, laster errekurrituko du. Mimenza, Tapia eta Urberuaga Euskal Preso Politikoen Kolektiboaren kideek Espainiako hainbat politikari eta kargudunen aurrean, euren eskubideen aldeko eta sakabanaketaren aurkako bat-bateko protesta burutu zuten abenduaren 20an.
Aipagarria da Vocentoko hedabideek behin eta berriro "ETAko presoak" bezala aurkezten dituztela hirurak, errealitatea nahiko ezberdina denean. Horrela, Asier Tapia Haika gazte erakundearen prentsaurreko bat emateagatik 103 urteko eskaera fiskala du eta oraindik ez dute epaitu. Borja Urberuaga leporatzen dizkioten gauza gehienetatik absolbitu dute eta ustezko mehatxu pintaketengatik baino ez dute epaitu behar. Artikuluetan bere izenagatik aipatzen ez duten Aner Mimenzari, berriz, kale erasoetan parte hartu izana egozten dio Baltasar Garzon epaileak, nahiz eta hori frogatzeko hutsaren hurrengoak diren zantzuak erakutsi dituen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun