Martxoaren 27an, sartu aurretik "inoiz baino miaketa gogorragoa" egin zioten Lander Labajoren neskalagunari Askatasunak azaldu duenez. "Bukatutakoan, preso algortarra miaketa gelara eraman zuten, eta azkenerako utzi zuten. Bost funtzionario sartu ziren zuzendariaren diligentzia bat erakutsiz: guztiz biluzteko agindua", gaineratu dutenez. Labajok, baina, bata eskatu zuen, eta biluzketa burutu zen eta ez zuten ezer aurkitu, iturri berberen arabera. Ondoren, x-izpiak pasatzeko prest zegoen ala ez galdetu zioten, eta algortarrak ezetz. Hortik erizaindegira eraman zuten, eta hutsik zegoen gela batean sartu, ordu betez bera bakarrik, funtzionario bat atearen atzean. Kamara txiki bat ikusi zuen gelan. Gaueko 10etan, Aranjuezeko epaitegiko idazkariak epailearen agindu bat erakutsi zion. Handik, furgoneta batean, Gregorio Marañon ospitalera eraman zuten, x-izpien bidez erradiografia egin zioten. "Goizaldeko 1:35 ziren espetxera heldu orduko. Erizaindegira berriro, erradiografiak aztertu zituzten, eta ziegara bidali zuten Lander", errepresioaren aurkako erakundeak amaitu duenez.
Labajo eta beste hainbat presori orain gutxi gertatutakoa "espetxe politika ezin bortitzagoaren adierazpenatzat" jo ditu Askatasunak. "Azken asteotan egoera guzti hauei (gaixotasun larriak dituzten presoek bizi duten egoera, bizi arteko zigorra, sakabanaketa, bakartzea...) miaketekin gertatzen ari dena gehitu behar zaie. Miaketa oso bortitzak ematen ari dira, bai presoei beraiei zuzenean egindakoak, bai eta beraien ziegetan funtzionarioak burutzen ari direnak, ziegak hankaz gora utziz, gauzak apurtuz...", salatu dutenez.
Aner Mimenza preso politiko getxoztarra larunbatean eraman zuten Cacereseko espetxetik Valdemorora (Madril), etxekoek UKBERRI.NETi jakinarazi diotenez. Dirudienez, diligentzietarako eraman dute, abenduaren 20an Soto del Real kartzela madrildarrean egindako sakabanaketaren aurkako protestaren harira. "Hala ere, ezin da ezer ziurtatu oraingoz, berari ez diotelako ezer azaldu", adierazi dutenez. Bestela ere, etxekoak bisita egitera bidean zihoazela enteratu ziren espetxe aldaketaz eta etxera bueltatu behar izan zuten asteburu horretako bisita galduta. Bestalde, egun Aranjuezen duten Lander Labajo gazte algortarrari martxoaren 27an "miaketa oso bortitza" egin ziotela salatu du Askatasunak. "Estatuek presoekin fisikoki amaitzeko egindako apustuaren baitan" kokatu ditu azken asteotako gertaera horiek errepresioaren aurkako erakundeak. Fleury Merogis (Paris), Soto del Real (Madril), Valladolid, Darocako (Zaragoza) espetxeetan gertatzen ari dira horrelakoak Askatasunaren arabera. Argazkian, Euskal Presoak Euskal Herriratzearen alde agerraldia egin zuten orain bi asteburu Getxoko Txorimalo gaztetxearen bigarren urteurrenean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun