Uribe Kostako Amnistiaren Aldeko Mugimenduak Etengabe bitakoraren bitartez jakinarazitakoaren arabera, atzo eguerdian krisialdi larri bat izan zuen Anjel Figueroa Algortako preso politikoak eta, gero, gauerdian beste larriago bat. Horren ondorioz Txagorritxun ospitaleratu dute berriro ere. "Anjelek izaten dituen krisialdien kronologiari erreparatuta badirudi ziklikoki izaten dituela. Orain Txagorritxun dagoelarik, komenigarria izango luke bertan denboraldi bat egitea, ospitalean kartzelan ez duen lasaitasuna izaten baitu, kartzelako bizimodua eta ordutegia guztiz desegokiak baitira holako gaixotasuna duten pertsonarentzat", adierazi du errepresioaren aurkako erakundeak. Bitartean, Garzonen debekua gora behera, 350 bat lagunek egin zuten mnifestazioa ostiralean Algortan. Arazorik gabe gainera, ertzainik ere ez zen aurkeztu. Argazkian, azaroaren 9an 200 bat lagun manifestatu ziren Anjel Figueroaren askatasunaren alde.
Kordobatik Langraitzera bueltan ekarri zutenean ere atake epileptiko larria izan zuen Anjel Figueroak. Azaroaren 29an, espetxera heldu zen egun berean, sarrera ziegan sartu eta berak erabili ohi duen flexoa kendu zioten algortarrari. Hain zuzen, ziegan hezitzaile eta beste preso batekin zegoela, funtzionarioa agertu eta liskarra sortu zenean izan zuen atakea. Bere onera bueltatu zenean, eskuak loturik aurkitu zen Figueroa, bere ama Mari Karmen Fernandezek adierazitakoaren arabera. Bestalde, bere urtebetetze egunean, abenduaren 6an, senide eta lagunek bidalitako eskutitzak ez zizkioten eman algortarrari. Hori dela eta, salaketa jarriko zuela adierazi zuen bere amak, "garrantzirik gabeko kontua dirudien arren, horrelakoak dira Anjelen egoera gero eta okerragoa egiten dutenak". Bitartean, Figueroari Kode Penalaren 92. artikulua aplika diezaiotela eta, ondorioz, kalera dezatela eskatzeko sinadurak batzen jarraitzen du Anjel kalera! herri ekimenak. Algortarrak epilepsia tenporala eta eskuinaldeko esklerosi mesiala dauka eta, orain gutxi, beste foku bat aurkitu zioten ezkerreko lobuluan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun