Sopeloztarrek beraiek itaun asko (2.456) egin badituzte ere, galdeketa gehien egin duen multzoa Bizkaiko beste udalerrien biztanleena izan da (2.608). Berriz, Araba (56), Nafarroa (45) eta Gipuzkoako (77) herritarrak ia ez ziren hurbildu Sopelako Turismo Bulegora, 178 galdera baino ez baitzituzten egin. Behe-nafarren, zuberotarren eta lapurtarren datuak, ordea, ez du eskaini udal erakundeak eta Sopelako Udalak "atzerritarren" multzoan kokatu dituenen artean, hots, Espainiako Estatutik kanpokoen artean, bilatu beharko lirateke. Bertan "frantziarrak" 520 izan dira, gehiengoa, ondoren Britainia Handikoak (340), alemanak (223) eta italiarrak (195) egon direla. Multzo osoari dagokienez, 1.859 itaun egin zituzten horiek eta beste nazioetako "atzerritarrak".
Espainiako Estatutik etorritakoek, berriz, 892 galdera egin zituzten. Haien artean nagusiak izan ziren Herrialde Katalanetakoak (395) eta Gaztelakoak (313), nahiz eta bertan Leongoak ere ageri.
Turismo Bulegora hurbildu diren lagun gehienek 27 eta 45 urte artean zituzten eta Sopela, Bizkaiko kostaldea eta Uribe eskualdeari buruzko informazio eske joan dira, hurrenez hurren. Turismo aktiboari buruzko xehetasunak eskatu zituzten gehienek, bai eta leku interesgarri, kultura eta kirol jarduerak, garraiabide eta ostatuei buruzko azalpenak ere. Informazio orriak, plano eta kaleen izendegiak hartu zituzten bulegoetan.
Sopelako Turismo Bulegoak 7.998 galdeketa erantzun zituen bukatu berri den 2007an. 2006an bulegora joan ziren lagunen kopuru beretsua zenbatu da iazko urtean, eta batik bat turismo sasoi txikienean handitu dira galdera eta bisitak. Urtarrilean, esaterako, 228 lagun joan ziren azalpen eske, 2006an baino 135 gehiago, eta martxoan 452 lagun, 2006ko 126 pertsonen aldean. Sopelako udal erakundeak jakinarazi duenez, "deigarria da uda garaian txikitu zirela bisitak, aurreko urtearen aldean eguraldi kaskarra egin zuelako". Abuztuan, adibidez, 2.174 pertsona joan ziren bulegora, eta 2006an 2.800. Hala eta guztiz ere “pozik egoteko moduko emaitzak dira, 2007rako genituen helburuak bete bait dira” adierazi du Nazareth Marina Albendea Turismo Bulegoko teknikariak. Argazkian, Sopelako turismo liburuxkak jasotzen duen irudietako bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun