“Eskularruak erostera” liburua japonieratik zuzenean euskaratu du Urko Labeaga Sopelako preso politikoak, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Liburua Hondarribiko AAMk argitaratu du eta salgai dago Algortako Amnistia tabernan eta Sopelako eta Hondarribiko herriko tabernetan, 10 eurotan. "Urkoren andrea, Ainara, Hondarribikoa da, eta liburua ia-ia Xuhar umearekin batera sortu dela esan dezakegu. Xuhar duela lau hilabete jaio zen, eta liburua gabonetan argitaratu da", azaldu du errepresioaren aurkako erakundeak. Liburuak japonierazko eta euskarazko testuak daramatza, bata bestearen aldean. Argazkian, “Eskularruak erostera” liburuaren aurrealdea.
Urko Labeaga Garcia 1971ean jaio zen Algortan. Soin Hezkuntzako Euskal Erakundean, Gasteizen, burutu zituen ikasketak eta irakasle modura jardun zuen Bilbon Ertzaintzak atxilotu eta espetxeratu zuen arte, ETAren Bizkaia komandoko kide izatea leporatuta. Hain zuzen, 42 urteko espetxe zigorra ezarri zioten horregatik. Giltzaperaturik dago 1998az geroztik eta hainbat kartzela ezagutu ditu. Egun Topasen dago, Salamancan. Arkitektura egitea zen bere nahia, baina ikasketak egiteko oztopo ugari aurkitu zituen kartzela barruan. Hala bada, hizkuntzak ikasteari ekin zion bere kabuz: ingelesa, alemanera, frantsesa, baita japoniera ere. Itzulpengintzarena izan da bere azken erronka eta “Eskularruak erostera” da argitaratu duen lehen lana, haurrei zuzendutakoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun