Euskal Autonomia Erkidegoko (EAE) eguzki-energia instalazio termiko handiena inauguratu zuten atzo Leioako Askartza Claret ikastetxean. Urteko 27.345 litro gasolio erretzea eta atmosferara 71 tona CO2 isurtzea saihestuko du ekoiztutako energiak, instalazioa egin duen Bikote Solar enpresak jakinarazi duenez. Horren arabera, geroz eta ikastetxe gehiago ari da EAEn energia-iturri garbien erabilpena bultzatzen, eta askok, dagoeneko panel fotovoltaikoak instalatu dituzte euren teilatuetan. Panel horiek elektrizitatea ekoizten dute eta eguzki-energia aprobetxatzeko era ezagunena dira, baina ez bakarra, ezta errentagarriena ere. Urtarrilaren 1etik martxan du Askartzak igerilekua klimatizatu eta dutxetan egunero erabiltzen diren 8.000 ur litroak berotzeko sistema berria, aurreko gasolio galdara ordezkatuz. Guztira, 200 eguzki panel termiko dago teilatuan, 400 metro koadroko azalera betez. Argazkian, Itzubaltzeta / Romoko Gobelan bezala, kiroldegi eta igerileku publikoetan ere ohikoa egiten ari da eguzki-panelak erabiltzea.
Bikote Solar enpresak pasa den udan jarri zituen panelak, udako oporrak aprobetxatuz. 200.000 euro inguruko inbertsioa behar izan du eta Energiaren Euskal Erakundearen (EEE) diru-laguntza jaso du horretarako. Instalazioaren urteko energia ekoizpena 232.430 kWh-tan balioetsi da (27.345 litro gasolio erreaz lortuko litzatekeen energia kantitate bera) eta urtero atmosferara 71 tona CO2 isurtzea ekidingo du. Gorka Macias Bikote Solarreko burua eta Alfonso Tejedor Askartzako zuzendaria bat etorri ziren atzo instalazioak ekarriko duen onurarik handiena azpimarratzean. "Aurrerantzean, ikastetxeko 2.500 ikasleek gertutik ezagutu eta gozatu ahal izango dute eguzkiaren erabilpena, eta, ezinbestean ikasiko dute eguzkia energia-iturri garbi, agortezin eta doakoa izan daitekeela", adierazi zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun