Algortako Fadura kiroldegiko batzar areto nagusian ospatuko dute gaur, hilak 9, 20:00etan, “Getxo Sasoi-Sasoian” I. Kirolaren Gala, Getxoko Udalak antolatuta. Horren bitartez, egunez egun, maila amateurrean kirolaren alde lan egiten duten getxoztarrei egin nahi diete gorazarre, atzoko prentsaurrekoan, Alvaro Gonzalez Kirol eta Josu Loroño Komunikazio zinegotziek adierazi zutenez. Alabaina, maila profesionalean "jarduerari eta kirol lizentziei dagokienez behintzat, Getxo udalerri garrantzitsua" dela ez dute ahaztu nahi izan udal arduradunek. Gauzak horrela, ekitaldian lau kirolari sarituko dituzte: Yera Campos tenislaria, emakumezkoen junior mailan; Jaime Bergareche padel jokalaria, gizonezkoen junior mailan; Yahaira Agirre judoka, emakumezkoen senior mailan; eta Ibon Garate pala jokalaria, gizonezkoen senior mailan, hurrenez hurren. Horien artean, "urteko kirolari getxoztarrik onena" aukeratu beharko dute galan parte hartzen duten guztiek. Ekitaldia urtero egiteko asmoa dute. Argazkian, maiatzaren 9an, 15 taldek eta 12 ikastetxetako gurasoen elkartek (IGE) sinatu zuten hitzarmena Getxo Kirolak udal erakundearekin.
Horretaz gain, bi talde sarituko dituzte kirol arloan lortutakoengatik: Getxo Futbol Taldeko Euskal Ligako gazteak eta Getxo Igeriketaren errelebo taldea, honako igerilari hauek osatuta dagoena: Ibon Arregi, Mikel Bildosola, Beñat Elorriaga, Almedin Mustafic, Eder Isuskiza eta Jon Bacigalupe. Bestalde, beste 5 sari berezi emango dituzte: “Aitzindariak” izenekoa, Manuel Martinez “Manolin” Athletic eta Real Madrileko jokalari ohiarentzat izango da; “Kiroltasuna”, ibilbideagatik, baloreak, kirol jarduera onak eta joko garbiagatik nabarmentzeagatik...., Pepin Lopez Jolaseta Patin Hockeyko entrenatzaileak jasoko du; “Getxo Berrituz”, kirol jardueran berrikuntza ekartzeagatik (kirol berriak sortuz, gutxiengoen kirolak eta asmatze ekintzak sustatzeagatik, kirolari atxikitutako teknologia garatzeagatik, kirol jarduerak antolatzeagatik, kirol marketing estrategia berriak ezartzeagatik...) Getxo Saski Baloi Taldearentzat izango da; “Getxo Zabala”, udalerrian kirolaren alde lan egin dutenentzako saria (kirola zabaldu, lagundu eta babestu... dutelako) Juan Pedro Guzman Galea Futbol Elkarteko sortzaileak jasoko du; eta, azkenik, “Marka Hautsiz”, mugak gainditzeagatik, mahai-teniseko jokalari Porfirio Hernandezek jasoko du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun