Orain dela zortzi urte Leioako Udaleko alderdi politiko guztiek Avanzadaren estaltzea -oraindik zabalik dauden guneak- eta Bilborako norantza duen aldeko bidetik (Luis Bilbao Libanoraino) Sabino Arana kaleraino luzatuko litzatekeen oinezkoentzako gunea sortzea suposatzen zuen proiektua onartu zuten. Ordutik hona ugariak izan dira alderdi politiko ezberdinek aurkeztutako proposamenak; baita auzotarrenak ere. "Trafikoaren bilakaerak eta Leioako hirigintza garapenak gaur egun are beharrezkoagoa egiten dute proiektu honen gauzatzea, orain dela zortzi urte adostutakoa oinarritzat hartuta gure herriak egun bizi duen egoerara egokituz. Avanzada Lamiakoko loturatik Artatzako errontondara arte guztiz estaltzeak Leioa berri bat posible egingo luke, bitan zatitutako herria izateari utziko lioke, oinezkoentzako gune zabal bat izango luke, neurrigabekoa den eta legez kanpo egon daitekeen kutsadura akustikoarekin amaituko litzateke… asko dira justifikatzen duten arrazoiak", adierazi dute behin eta berriro orain gutxi osatutako Avanzada estaltzearen aldeko plataformak. Hain zuzen, sinadurak batzen ibili dira azken asteotan, aldarrikapen hori mozio herritar gisa udaletxera eramateko.
Ekimen zehatzak
Azaroaren 29an Leioan izandako udal batzarrean ere, gaur aipatutako "baldintza teknikoen araberako" konponbideaz berba egin zuen tokiko gobernuko jabe den EAJk, Avanzadaren auziari irtenbidea emateko asmoz, Bizkaiko Foru Aldundiarekin harremanak berrartzea babesteko. Aurretik, "Avanzadarekin leporaino bustiko" zirela esanda zeukan Eneko Arruebarrena alkateak. Hori bai, eurena ezean, "ardura Aldundiarena" dela aipatuz. Alabaina, burubidea ez zaie "nahikoa" iruditzen Avanzada estaltzearen aldeko plataformako kideei: "konpromiso zehatzak eta hauek aurrera eramateko aurrekontu sailak dira behar direnak", diote.
Bizkaiko Batzar Nagusietako EAJk Avanzada (argazkian) estaltzeari "berriro ere ezezkoa eman" diola salatu du, prentsa ohar bidez, Alderdi Popularrak. Hain zuzen, gaurko Azpiegitura, Garraio eta Hirigintza Batzordean aipatu auzia izan da eztabaidagai popularren ekimenez. Arauz besteko proposamenaren (pdf) bidez, Avanzadako errepidea Leioako udalerrian zehar lurperatzeari buruzko proiektua sei hilabeteko epean aurkeztea eskatu dio Bizkaiko Foru Aldundiari PPk. Jelkideek, ordea, "hilabeteko epean bigarren aldiz agertu dira proiektuaren aurka, oinarririk gabeko arrazoiak emanez", Jesus Isasi batzarkide popularrak deitoratu duenez. Bere hitzetan, "EAJk ez du eperik finka dezagun nahi, ezta idatzizko konpromisorik hartu ere. Bere konpromiso eza agerian jarri gabe, denborak aurrera egin dezala besterik ez du nahi. Egitan, errepidea lurperatzearen alde badaude, behin baino gehiagotan galdu dute hori frogatzeko aukera, egin behar zen lekuan, hau da, Batzar Nagusietan. Beste guztia, hitzontzikeria baino ez da". Jelkideek eurek zuzenketa (pdf) aurkeztuta zeukaten Alderdi Popularrak egindako proposamenari, "Leioako Udalarekin Avanzada errepidea lurperatzeko edo estaltzeko konponbide egokiren bat, aukera teknikoen araberakoa" Aldundiari eskatuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun