“Uribe Kostaren etorkizuna: berdintasun eta iraunkortasunerako lurraldea” lelopean Urdulizen azaroaren 9an eta 10ean antolatutako jardunaldien ostean, orain, mapan jaso nahi ditu errealitate guztiak Uribe Kostako Zerbitzu Mankomunitateak. Orduan, orain arte albo batera itxi izan den errealitatearen ikuspegi bat, emakumeena, aintzat hartu zuten mugikortasuna, irisgarritasuna, gune publikoetako segurtasuna, lana eta norberaren zein familiaren bizimodua bateragarri egiteko ahalegina, umeak eta adinekoak zaintzeko ardura konpartitua, ekipamenduak, ingurumena... eta lurralde honetako herritarren eguneroko bizimoduari eragiten dioten beste gai batzuen inguruan hausnarketa egiteko. Azken batean, mankomunitatea osatzen duten zazpi udalerriotako bakoitzean ahuleziak antzemateko. Hain zuzen ere, aurreko jardunaldietan diagnostikatu ziren beharrak, aldaketak edo hobekuntzak, edo aipatu gabe geratu zirenak fisikoki kokatu nahi dituzte mapa horretan, kontuan har daitezen. Tailerrok urtarrilaren 18ko eta urtarrilaren 25eko asteburuetan egingo dira. Oraindik ez dira zehaztu orduak eta lekuak, baina parte hartu nahi duten emakume guztiek hilaren 16a baino lehenago adierazi beharko dute.
Uribe Kostako Mankomunitatea osatzen duten udal guztietako emakumeei dei egin diete tokiko arduradunek, jardunaldietan parte har dezaten. Bi saio egingo dira, bakoitza bi ordukoa, bi asteburutan: bi ordu asteburu batean eta beste bi hurrengoan. Saio batetik bestera astebete utzita, tailerretan parte hartzen dutenek aukera izango dute aldatu behar direla uste duten edo nahi dituzten lekuen argazkiak ateratzeko, hori guztia grafikoki dokumentatu ahal izan dadin. Izena emateko, 946 762 674 telefonora deitu edo e-postara idatzi (berdintasuna[abildua]uribekosta.org edo agenda21[abildua]uribekosta.org) beharko dute andreek. Saio hauetan parte hartzeko, gainera, ez da beharrezkoa azarokoetan parte hartu izana.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun