Bizkaiko Foru Aldundiko Ingurumen Sailak kudeatzen duen Garbiker enpresak erabilitako jostailuak biltzeko egitasmoa jarri du martxan. Hondakinen bilketa hautakorraren esparrukoa den ekimen berria Koopera gizarte-sareko Rezikleta elkartearekin elkarlanean burutuko da, foru erakundeko iturriek prentsa ohar bidez gaur jakinarazi dutenez. Horren bidez, lehenik eta behin, "beste mota bateko hondakinak lehengoratzeko eta herritarrei ingurumena hobetzeari dagokionez oraindik ere aurrera egiteko aukera badagoela ulertaraztea" lortu nahi dute, eta aldi berean, "gizartean onura handia lortu". Besteak beste, Algortako Larrañazubiko antzineko zabortegian dagoen Ingurumen Aretoan kokatutako garbigunean jasoko dituzte bihartik aurrera erabilitako jostailuak. Argazkian, maiatzaren 8an aurkeztu zuten ingurumen areto berria / Getxo.net.
"Ekimen horren bitartez, etxeetan biltzen den objektuen gehiegizko kopuruari irteera egokia emango zaio eta, aldi berean, ohiko saltokietan jostailuak eskuratzeko arazoak dituzten pertsonen eskura iritsiko dira", adierazi dute foru arduradunek. Gainera, lana topatzeko sailtasunak dituzten edo baztertuak izateko arriskuan dauden pertsonak ere lagunduko dituzte, "horiek izango baitira jostailuak lehengoratuko dituztenak". Jostailuak lehengoratu ostean, bigarren eskuko merkatura iritsiko dira eta gizarte proiektuetako beharrizanak asetzeko erabiliko dira. Bildu arren berriz erabiltzeko baldintzak betetzen ez dituzten jostailuak Garbikerrek kudeatuko ditu "mota horietako hondakinetarako tratamendu egokien bidez". Bilketa bihar hasiko da ondoko udalerrietako garbiguneetan: Barakaldo, Basauri, Durango, Gernika, Getxo, Markina, Santurtzi eta Zalla.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun