Erandioko Udalak egindako galdeketaren bidez, Astrabuduako Juanene plaza (argazkian) oinezkoentzako gunea bilakatzea eskatu dute inguruko auzokide gehienek. Aisialdirako esparrua zena, autoz gainezka egoten den bat-bateko aparkalekua bihurtu da urteen poderioz, udal arduradunek adierazi dutenez. "Askotan larrialdi zerbitzuek ere ezin daitezke bertatik igaro", zehaztu du gaur Aitziber Oliban udal bozeramaileak. Jabego pribatuko eremua da Juanene plaza. Hortaz, auzotarrei dagokie horren gaineko erabakia hartzea. Behin, tokiari zer irtenbide eman aztertzen hasita, "bizilagunen artean adostasun mailarik handiena" lortzeko modua bilatzen hasi ziren tokiko agintariek. Horrenbestez, 200 etxeetara bi boto-txartel bidaltzea erabaki zuten, abenduaren bukaerara arte bata edo bestea udal bulegora eramateko aukera emanez bertokoei. Aukeran, aparkatzeko tokiak arrazionalki ordenatzea edo lekua oinezkoentzat bakarrik izatea. Botoak zenbatuta, 143 familiek eman zuten iritzia, parte-hartzea %65 ingurukoa izan zela. Horietatik 113 sendik (%80,14) plaza oinezkoentzat izatea eskatu zuten. Beste 28k (%19,86), ordea, autoa bertan uzten jarraitu nahi dute. Azkenik, biren bozka baliogabe suertatu zen, bata edo bestea aukeratu beharrean, proposamen berriak planteatu zituztelako. Horri erreparatuta, aurrerantzean boto-txarteletan iritzia emateko tartea ere jarriko dutela aipatu du udal bozeramaileak.
"Oraindik esku artean inolako egitasmorik ez dugun arren, Juanene plaza oinezkoentzat izango da", agindu du Olibanek. Galdeketa planteatu zutenean ere "%65ko parte-hartzea izanez gero, emaitza errespetatzeko konpromisoa hartu zuen Udalak", zinegotziak zehaztutakoaren arabera. Halaber, "Hirigintza auzien gainean" iritzia emateko, herritarren parte-hartzea sustatzen jarraituko dutela baieztatu du Olibanek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun