Londresko auzitegi batek absolbitu egin du Alberto Izaga (argazkian) bi urteko alaba, Janire, kolpeka hil zuen algortar enpresaburua, hainbat hedabidek zabaldu dutenez. Iazko ekainaren 3an jazo zen dena. Neskatoa, baina, handik eta bi egunera hil zen, ospitalean. Adituen ustez, Izagak burua galdu zuen eta horren ondorioz hil zuen alaba. Fiskalak eta defentsak aske uzteko eskatu zuten, beraz. Richard Hone epaileak algortarra psikiatren esku uzteko agindu du. Auzia "apartekoa" izan da bere ustez. Gizonak Swuss Re aseguru-etxe suitzarrean lan egiten zuen, prentsa britainiarrak azaldu duenez, eta gertaeraz geroztik lanik eta soldatarik gabe utzi dute. Izaga baldintzapeko askatasunean izan da orain arte eta atzo bertan epaitu zuten Londresen.
Antza, Alberto Izaga "Bug" beldurrezko filmearekin tematuta zegoen. Pelikula horretan, bikote bat erotu egingo da euren azalen azpitik zomorroak dituztela ikustean. Filma ikusi eta gutxira, Genevara joan zen, eta bertan abenturazale baten motibazio-hitzaldia entzun zuen. Horrek hunkitu egin zuen. Etxera bueltan zenean, ekainaren 2an, oso nekatuta eta ezin lorik egin zegoela esan zuen. Hala eta guztiz ere, hilketaren egunean goiz esnatu zen eta bi orduz Jainkoaz eta sektetaz gaizki hitz egiten egon zen. Ostean, alabari eraso zion, bat-batean. Haren emaztea, Ligia, senarra geldiarazten saiatu zen, baina alferrik. Gizona "Badakit zer egin behar dudan, [alaba] hil behar dut" esaten ari zen neskatoa kolpatzen zegoen bitartean. Jonathan Rees fiskalaren hitzetan, aita eta alaba oso lotuta zeuden. Janire "Lurrean gehien maite zuen pertsona" zela esan zuen Alberto Izagak, neskatoa hil eta gero.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun