Aitor Elortza Unanue iheslari politiko algortarra 2006ko urtarrilaren 16an hil zen Baionan 25 urte ihesean eman ondoren. Elortza Ipar Euskal Herritik Mexikora ihes egin zuen 80eko hamarkada hasieran. Ondoren, Ipar Euskal Herrira bueltatu zen berriro eta 1991ko maiatzean atxilotu eta Fresnesen (Paris) espetxeratu zuten 1992ko arte; 1993an epaitu ondoren, absoluzioa jaso zuelarik. 1994an berriz atxilotu zuten eta Metz-era bidali zuten. Bertan, zaintzapean ostatu batean bizitzera behartu zuten. Aste batzuk beranduago, konfinamendua apurtu eta Euskal Herrira bueltatu zen. Hain zuzen ere, Elortzak "Euskal Herri libre eta justu baten alde" egindako ibilbidea aintzat hartuz, iheslari algortarra zenari omenaldia egingo diote ostiral honetan, urtarrilak 18an, 20:00etan, Algortako Telletxe plazan, Uribe Kostako Amnistiaren Aldeko Mugimenduak deituta. Argazkian, 2006ko ekainaren 11an, Elortzaren errautsak Algortako Portu Zaharrean zabaldu zituzteneko irudia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun