Imanol Landa alkate getxoztarrak azaldu duenez, "jolasen bitartez neska-mutilak heztea" da ekimen berriaren helburua. "Euskararen erabilerari ere garrantzi handia emango diogu, ume eta gazteak baitira gure hizkuntzaren etorkizuna bermatuko dutenak", gaineratu du udal agintariak. Alabaina, ludoteka "haurtzaindegia ez" dela argi utzi nahi izan du Landak: "gurasoak hurbil edo erraz lokalizatuak izateko moduan egon beharko dira umeak barruan dauden bitartean, neska-mutilen bat aspertu eta irten nahi baldin badu behintzat. Horrek ez du kentzen aita-amek erosketak edota bestelako gestioak egiteko tartea izatea", azaldu du. Izan ere, lana eta familia bateragarriago egiten laguntzea ere bada ludotekaren helburuetako bat. Bi hezitzaile profesional izango dituzte alboan uneoro haurrek.
Txikiegia agian
Areetako udal ludoteka berria "txikiegia" dela aitortu du Unai Amezaga Gazteria teknikariak: "73 metro koadro baino ez ditu eta ondo funtzionatu ahal izateko, txanda bakoitzean gehienez 25 bat ume izan beharko lirateke barruan", adierazi duenez. Hala ere, dagoen tokiari ahalik eta atarramendu gehien ateratzen ahalegindu dira: "eskulanak egin edota mahai-jokoetan aritzeko mahai eta aulkiak kenduz gero, lurrean koltxonetak jarri eta psikomotrizitatea lantzeko aukera badago. Horretaz gain, jolas sinbolikoak eta antzeztekoak egiteko gunean ere jarri ditugu", azaldu du Amezagak. Bestalde, egunero, txanda bakoitzeko lehenengo 45 minututan ateak zabalik (gauza batera edo bestera jolastea libre) egongo diren arren; hurrengo hiru ordu laurdenetan ateak itxi eta barruan dauden neska-mutilekin baino ez dituzte landuko adin tarte bakoitzari bereziki zuzendutako jarduerak.
Ludotekak, gaztelekuak eta haur eskolak
Getxo udalerriko ume eta gazteei zuzenduta, udal gobernuak landutako egitasmoaren lehenengo pausua baino ez da Areetako ludoteka, Imanol Landa alkateak esandakoaren arabera. Batetik, Algortako Aita Felix de la Virgen kaleko 2 eta 4 zenbakien artean dagoen 300 metro koadroko lonja, San Nikolas plazaren inguruetan, erosita dauka jada Udalak, bertan ere ludoteka egiteko. Bestalde, Urgull kalean, antzinako Algortako kultur etxea zeneko lokalean, "denbora gutxian" zabalduko dute gaztelekua eta, Itzubaltzeta / Romo eta Areetan ere beste horrenbeste jartzea aurreikusten ari dira, Landak aurreratu duenez. Azkenik, Algortako San Inazio ikastetxean aurten irekiko dute haur eskola.
Marisa Arrue Getxoko PPko bozeramailea eta Raquel Gonzalez zinegotzi popularra ere bertan zirela eman ditu, gaur goizean, Eskoletako plazako lokalean bertan, Areetako udal ludoteka berriaren gaineko xehetasunak Imanol Landa alkateak. Hain zuzen ere, gaur, arratsaldeko 6etan inauguratuko dute, parte hartu nahi duten neska-mutil guztientzat zabalik egongo den “Patxin eta Potxin” pailazoen emanaldia eta txokolate jana batekin. Guztira, 5 eta 12 urte bitarteko 60 ume eta gaztek izena eman dute ludotekan. Gauzak horrela, berriro ere bazkide egiteko epea zabaltzea ez du baztertzen Udalak, tokiak geratzen baitira. Areetako udal ludoteka astelehenetik ostiralera egongo da zabalik, 17:00etatik 20:00etara. Lehenengo txandan, 17:00etatik 18:30era, 5 eta 8 urte bitarteko umeak egongo dira; eta, bigarrenean, 18:30etik 20:00etara 9 eta 12 urte artekoak. Argazkian, bi umek horma irudia egiten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun