Bi atal nagusitan banatuta dago. Lehenengoan, Metro Bilbaoko langileentzat gertukoak eta ezagunak diren adibideak baliatu dituzte, hizkuntza zelan erabili behar den edo zelan erabil daitekeen erakusteko; eta zelan hobetu ere proposatzen da. Erakundean gehien erabiltzen diren hitzen glosategia ere erantsi dute, eguneroko lana erraztu eta arintzeko. Bigarrenean, irudiak jorratu dira eta oinarrizko ildoak zehazten dira, karteletan eta publizitateko iragarkietan argazkiak zein marrazkiak erabili behar direnean, emakumeei eta gizonei balio berbera eman behar zaiela azpimarratuz. Garraio enpresarentzat "hizkuntza funtsezkoa da berdintasunaren puzzlea ondo osatzeko eta emakumeak dagokien tokian eta moduan ikusi eta erakustea lortzeko". "Bizkaian erreferentea denez, eragile eta biderkatzaile izan gura du inguruko beste enpresa batzuetan ere berdintasun-ekintzak eta planak bidera daitezen", adierazi dute metroko arduradunek.
Gida Metro Bilbaoko webgunean (www.metrobilbao.com) ere aurkituko daiteke. Enpresak berdintasunaren alorrean hobetzeko eta "barruko zein kanpoko baldintzak bete daitezen" laguntzeko abiarazi dituen ekintzetako bat da. Metro Bilbao Bizkaiko Foru Aldundiaren "Parekatuz" sareari eta Eusko Jaurlaritzaren "Optima" programari heldu zien lehenengo enpresen artean dago. Halaber, 2005ean indarrean jarri zen Emakumeen eta Gizonen Berdintasun Legean eta Europar Batasuneko Emakumeek eta Gizonek Aukera Berdinak izateko Batasuneko Ekintzaren Egitarauan ematen diren gomendioak betetzen ditu.
Metro Bilbaok liburuxka bat atera du garraio enpresan hizkuntza ez-sexista erabiltzea sustatzeko. "Metro Bilbaon hizkuntza berdintasunez erabiltzeko gida" egiteko Bizkaiko Foru Aldundiko diputatu nagusiaren kabineteko Genero-Politiketarako Sailaren laguntza teknikoa eduki dute, eta Metro Bilbaok "emakumeen eta gizonen berdintasun-programak abiarazteko hartu dituen konpromisoen esparruan" sartuko litzateke egitasmoa. Gida egiteko ideia 2004an sortu zen, langile gehienei (sailetako buru, agintedun, arduradun tekniko, bezeroen arretako langile, geltokietako langile eta sindikatuetako ordezkariak) komunikazioari eta generoari buruz emandako ikastaroen harira. Argitalpena barrurako zein kanporako informazio oharrak idazten dituen jendearentzako tresna eraginkorra izan dadin pentsatuta dago, berdintasuna errespetatzen duen hizkuntza zelan erabiltzen den erakusteko, alegia. Argazkian, metroko langile bat beharrean, bezeroak trenera sartzen diren bitartean, artxibo irudi batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun