Azaroaren 10ean eta 11an jokatu zen, Sopelako Atxabiribil hondartzan, El Diario Vasco Euskal Bodyboard zirkuitoko hirugarren proba. Eta emaitzak ikusita, aukera handiak dituzte Uribe Kosta eskualdeko ordezkariek txapela janzteko. Larunbateko saioan, Iñaki Llona getxoztarrak eskuratu zuen garaipena, open B mailan. Atzetik, Isusko Barrenetxea, Borja Fernandez eta Gorka Lasa. Emakumezkoen artean, berriz, Eunate Agirre sopeloztarrak irabazi zuen. Atzetik jarraitu zioten Conchi Anillok, Eider Paredesek eta Aitziber Aberasturik. Grosen amaitu barik geratu zen bigarren probako finalalari (open A maila) dagokionez, etxeko Aritz Larrinaga izan da nagusi, eta jarraian egungo Europako buru, Beñat Elosua, Joserra Martinez eta Antonio Ortiz. Azkenik, igandean, David Perez sopeloztarra izan zen irabazle, hirugarren probako open A mailako finalean. Sopelakoak ere diren Antonio Ortiz eta Aritz Larrinaga, bigarren eta hirugarren geratu ziren.
Bitartean, aurreikusten zenez, 18 urtetik beherakoen kategorian finkatuta daude jada rankingeko postuak, faboritoak izan baitziren nagusi. Horrela, Ander del Puerto eraman zuen garaipena, eta jarraian sailkatu ziren Harri Gorospe, Imanol Osteritz eta Ugaitz Velasco. 16 urtetik beherakoetan Unai Insausti izan zen bikainena. Borja Gainzarain, Gozalo Velasco eta Jon Martinez jarraitu zioten finaleko podioan.
Abenduan amaitu zen Lemoizko Extreme Bodyboard txapelketa egiteko itxaronaldia; hortaz, luzatzea erabaki dute. Urtarril osoa finkatu dute epe berri bezala. "Denbora honetan txapelketa ospatzeko behar diren baldintzak betetzea espero dugu; olatu berezi hori eragiten duen borraska alegia", adierazi du Euskal Herriko Surf Federazioak (EHSF). El Diario Vasco Euskal Bodyboard Zirkuituko laugarren eta azken proba dugu hori. Lehendabiziko aldiz ospatuko da proba Lemoizko zentral nuklearra zeneko uretan. Hara joko dute zirkuituko 16 kirolari onenak. Ranking honen buru dago, gainera, Aritz Larrinaga bodyboarder sopeloztarra. "Oso olatu preziatua da bertokoa, batez ere modalitate hau praktikatzen dutenentzat. Baldintzak egokiak badira ikuskizun bikaina izango dugu", azaldu dute. Bitartean, Galeako olatuaren zain jarraitzen dute surflariek. Atzo iragarritako haize bolada idartsuak ere ez omen dira nahikoak. Argazkian, David Perez, Sopelakoa baita, Lemoizen txapela janzteko aukera handiak ere baditu / EHSF.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun