"Getxopapera" agerkariaren lehenengo alea etxez etxe banatzen ibili da azken asteotan Getxoko Eusko Abertzale Ekintzak. Besteak beste, Algortako Begoñako gazteluko galerien etorkizuna, Bilbo Metropoliaren Lurralde Zatikako Planak udalerrian izan ditzakeen ondorioak, udal tasak eta aurrekontuak, eta indarkeria sexista dira hasierako berripapererako aukeratu dituzten gaiak. Halaber, EAE Udaletik kanpo utziz sortutako "gezurrezko gehiengoez" luze jardun dute, egun alderdi ekintzailea ez ezik, EHAK ere legez kanpo uzteko, "nahikoa oinarri" baduela dioenean Espainiako Fiskaltzak. Getxopaperaren lehenengo alea jaso nahi dutenek anvgetxo[abildua]gmail.com e-posta helbidera mezua bidaltzea besterik ez dute. Argazkian, Mariespe Fuertes Getxoko EAEko hautetsia osoko bilkura formalki bukatu ondoren hitza hartzen, "apartheid egoera" salatzeko.
Hain zuzen ere, e-posta helbide hori baliatuz, galderak bidaltzeko aukera ere edukiko dute irakurleek; eta horiei erantzuten saiatuko dira ekintzaileek, "Bota puntue!" izenburuko atalean. Oraingo honetan, Getxoko zinegotziek zenbat kobratzen duten izan da gaia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun