Hainbat kale oinezkoentzat jartzeko Erandioko Udalak abiatutako egitasmoak, batik bat, Astrabudua eta Altzagan areagotu ditu aparkatzeko arazoak Javier Ruiz PPren bozeramaileak adierazitakoaren arabera. Bere hitzetan, dagoeneko "oinazealdia" suertatzen da autoa non utzi aurkitzea; baina dohainiko hainbat parking kentzeko erabakiak "egoera larriagotu baino ez" du egingo, zinegotzi popularraren ustez. "Beharrezkoak badira aipatu lanak, udalerria hobetzen laguntzen dutelako. Kontua da gobernu taldeak ez dituela aparkalekuak kentzeak ekarri dituen kalteak neurtu; ezta horiei irtenbidea emateko modurik aurreikusi ere", dio Ruizek. Gauzak horrela, "ahalik eta lasterrek neurriak hartu eta aparkatzeko arazoari irtenbidea emango dion politika diseinatzea" eskatu dio udal erakundeari PPk. Bestalde, Astrabuduako lagunek Avanzadako errepideko Eroski merkataritza-gunera joateko erabiltzen duten bidea eta Leioarekin bat egiten duen Txakurzuloko aldapa "berehala" konpontzea eskatu dio Mikel Arieta-Araunabeña alkateari Erandioko PSE-EEk. Argazkian, auzotarren erabakiz oinezkoentzat jarriko duten Astrabuduako Juanene plaza.
Juan Otermin PSE-EEren bozeramailearen arabera, Astrabudua eta Leioako merkataritza-gunearen arteko bidea asko erabiltzen dute auzotarrek, "batez ere adin nagusiek eta mugitzeko dituzten lagunek". Zinegotziak gaineratu duenez, "lokatzez beteriko gunea da eta ez dago argirik. Gainera, saihesbide berriko bihurgunetako batean dagoen zebra-bide bakarra ikuspen-murritzekoa da; oinezkoentzat ez ezik, gidarientzat ere arriskua sortuz". Hori dela eta, horren gaineko azterketa eta lanak egitea eskatu diete Udal zein Bizkaiko Foru Aldundiari konstituzionalistek. Txakurzuloko aldapari dagokionez, "argirik gabe eta zikin jarraitzen du, azkeneko lanak egin zirenetik urte bete baino gehiago igaro denean", Oterminen arabera. Bere ustez, "lotsagarria da XXI. mendean bete-betean Erandio bezalako udalerrian horrelakorik gertatzea".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun