Aner Mimenza (argazkian), Asier Tapia eta Borja Urberuaga zigortu eta bakartuta dauzkatela-eta, "borrokaldian" hasi dira Soto del Real (Madril) espetxean dauzkaten euskal preso politikoek, "beraien kontrako zigor neurriak kendu eta isolamendutik atera daitezela aldarrikatzeko", Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. "Borrokaldi honetan, astelehen eta astearteetan uko egiten diote gosari eta afariari eta asteazkenetan gosari eta ziega garbitzeari", azaldu du errepresioaren aurkako erakundeak. Mimenza, Tapia eta Urberuaga Euskal Preso Politikoen Kolektiboaren (EPPK) kideek Espainiako hainbat politikari eta kargudunen aurrean, euren eskubideen aldeko eta sakabanaketaren aurkako bat-bateko protesta burutu zuten abenduaren 20an. Horregatik, "hertsapen edo mehatxu terroristen delitua" leporatzea aztertzen ari dira Espainiako Auzitegi Nazionaleko Espetxe Zaintzarako Epaitegi Nagusiko Fiskaltza eta epailea, Espainiako Barne Ministerioak horrela eskatuta.
Ez dira gutxi Madrilgo Soto del Real espetxean dituzten Uribe Kosta eskualdeko euskal preso politikoak. Besteak beste, bertan dira Aner Mimenzarekin batera, urriaren 16an Algortan, Getxon eta Berangon egindako sarekadan atxilotu zituzten Mikel de Gregorio, Lander Labajo eta Joseba Elorriaga gazte algortarrak; baita azaroaren 22an Baltasar Garzon epailearen aurrean aurkeztu ondoren kartzelaratu zituzten Juan Bautista Galdiz "Batis" eta Gorka Oribe. Bestalde, Soto del Realen dituzte Urtzi Murueta leioaztarra, Manex Zubiaga algortarra eta Lexuri eta Irantzu Gallastegi ahizpa berangoztarrak. Azken hori, amen moduluan dago, bere alabarekin. Abenduaren 18an atxilotu zuten Algortan jaio eta Errigoitiko bizilaguna den Marije Fullaondo Batasuneko Mahai Nazionaleko kidea ere bertan da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun