Tatiele de Sousaren erailketa salatuko dute iluntzean Algortan
2008ko urt. 21a, 16:07
"Emakumeon aurkako indarkeriari aurre egitea denon ardura da! Erailketa gehiagorik ez!" lelotzat hartuz, kontzentrazioa antolatu du gaur arratsaldeko 7:30erako, Telletxe plazan, Algortako Bilgune Feministak. Mobilizazio horrekin ostiral goizaldean (urtarrilak 18), Iruñeko Arrosadia auzoan gertatutako erailketa salatu nahi dute. Udaltzainek Gelbentzu karrikan aurkitu zuten hilda 20 urteko Tatiele de Sousa brasildarra, seigarren zenbakiko laugarren solairuko etxebizitza batean, eta ustez emakumearen bikotekideak hil zuen. Lepoa moztuta zeukan biktimak, eta ustezko erasotzailea bera gertaeraren ondoren, etxeko leihotik salto eginda, bere buruaz beste egiten saiatu zela esan zuten udaltzainek. Bilgune Feministaren ustez, "guztiok erantzun beharreko kontu bat da, guztion inplikazioa beharrezkoa da". Hartara, herritar guztiak deitu dituzte iluntzeko kontzentrazioan parte hartzera. Argazkian, azaroaren 25ean, Algortako Bilgune Feministak deituta, emakumeen aurkako indarkeriaren kontra egindako elkarretaratzea.Goizaldeko 4:22an bizilagun batek udaltzainei deitu zien, Arrosadia auzoko etxe hartan "eztabaida gogorra" zegoela-eta. Poliziak etxera joan zirenean, atea bota egin behar izan zuten, eta barruan emakumea hilik aurkitu zuten. 20 urte ditu biktimak, eta jatorriz brasildarra zen. Eraikin kanpoan gizonezko bat topatu zuten zaurituta; ustezko erasotzailea. Horrek 23 urte dauzka eta bera ere Brasilgoa da sortzez. Iruñeko Instrukzioko 2. Epaitegiak Tatiele de Sousa brasildarraren bikotekidea fidantza barik espetxeratzeko agindu zuen ostiral arratsaldean, giza hilketa delitu baten ustezko egilea delakoan. Epailea Nafarroako Ospitalera bertaratu zen, gizona bertan baitzegoen, poliziaren zaintzapean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun