Sopelako Udalak herriko toponimia bildu, sailkatu, kokatu, aztertu eta finkatzeko beka deitu du. Horren zenbateko osoa 18.000 eurokoa izango da, eta zati bat bekaren zuzendaritza lana ordaintzeko erabiliko da. Lana egiteko epea 12 hilabetekoa izango da, beka esleitzen den egunetik hasita. Udal sopeloztarreko iturriek adierazi dutenez, emandako dirua ez da ikerketaren ordainsaria izango, ikerketa lana egiteko laguntza baizik. Azken txostena euskaraz aurkeztuko da eta horren laburpena ele bitan, eta Uribe Kostako Zerbitzu Mankomunitateko Euskara Zerbitzuaren ardurapean burutuko da, Euskaltzaindiaren gidaritzapean. Eskatzaileak (edo lantaldea bada, kideetako batek gutxienez) Euskal Filologia ikasketak burututa izan behar ditu, edo Historia ikasketak burututa edo azken kurtsoan egon behar du. Historiako ikasketak izanez gero, euskal hizkuntzalaritzan ezagupen eta trebakuntza ere egiaztatu beharko du. Gauzak horrela, behin deialdia Bizkaiko Aldizkari Ofizialean argitaratuta, otsailaren 15a izango dute azken eguna izena eman nahi dutenek. Argazkian, Gatzarriñe eta Iberre kaleen arteko gurutzagunea Larrabasterran.
"Toponimoen bilketa eta finkapena Sopelanan (sic)" gaiari buruzko txostena aurkeztu behar du eskatzaileak. Adjudikaziodunari proiektuaren erantzule izango den zuzendaria jarriko zaio, proiektua gidatu eta koordinatzeko. Zuzendari hori Euskaltzaindiak izendatuko du, eta 2.160 euro jasoko ditu bere lanagatik. Interesatuek Sopelako Udaleko Erregistro Orokorrean aurkeztu beharko dituzte eskabideak, espediente akademiko xehatu eta osoarekin; Euskal Filologia ikasketa arautuak egin direla ez badira frogatzen, hizkuntzalaritza ezagupenen, lan esperientziaren edo ezagupen horien adierazgarri direnen diploma edo ziurtagiriak aurkeztuz; curriculum vitaearekin; lana nola egingo lukeen adieraziz memoria bat; eta eskatzailearen nortasun agirien fotokopiarekin. Eskatutako zerbait betetzen ez duten eskabideak eta agiriak jasotzen badira, hamar eguneko epea izango dute akatsak zuzendu edo behar diren agiriak aurkez ditzaten. Horrela egingo ez balute, eskabideak artxibatu egingo lirateke besterik gabe. Deialdiaren oinarriak udal webgunean daude eskura, pdf formatuan. Bestela, oinarri horiek Sopelako udaletxean, Sopelako kultur etxean eta Uribe Kostako Zerbitzu Mankomunitateko Euskara Zerbitzuan (946 762 674) eskura daitezke.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun