Euzko Alderdi Jeltzalearen Bizkai Buru Batzarraren prentsa oharra:
Bizkai Buru Batzarrak bat egin du erasotutako batzokiekin
EAJren EBBk solidaritate mezua bidaltzen die bart gauean eraso dituzten batzokietako udal antolakundeekin. EAJren talde sozial osoa beraiekin dago, eta beren atsekabearekin eta ezinegonarekin bat egiten dute.
Era berean, BBBk galdetzen dio ezker erradikalari —hura baitago erasoen, mehatxuen eta pintaden atzean— hori ote den Euskal Herriari bakea konponbide ekartzeko bidea; hori ote den beste indar politiko batzuekin lankidetza klima sortzeko modurik onena, behin eta berriz erreklamatzen diguten moduan. Modu bitxia da babesa eta sinpatia irabazteko, "torturatzaile" edo "txakur" deitzea, edota diana bat ipintzea gure siglei. Bereziki larriak eta esanguratsuak dira Juan Maria Atutxari elkartasuna adierazteko kartelen kontrako erasoak. Jasotzen dituzten eraso judizialentzat elkartasuna adierazten dutenek horrela erantzuten diote Eusko Jaurlaritzako presidente ohiak bizi duen injustiziari. Babesa eta elkartasuna eskatzen dute eurentzat, baina besteekin elkartasuna adierazteko duten modua mehatxua eta errespetu falta dira.
Askotan, ezker erradikalak honako hau galdetzen digu: "zer egin behar du EAJk?". Jakin dezatela EAJk herri honen nortasun zeinuak defendatzen jarraituko duela, Euskadi aske eta bake giroan izateko lanean jarraituko duela, demokrazia abiapuntu gisa hartuta eta euskal herritarren erabakiak kontuan hartuta, nahiz eta bidean bart bezalako gau beltzak bizi behar izan, modu koordinatuan autoritario talde batek gure batzokiak boikoteatuta. Abertzaleak ez beste edozer dira.
Euzko Alderdi Jeltzalearen Bizkai Buru Batzarra
Areetako Ondarreta batzokiaren aurka hainbat pertsonek margo gorri eta horia bota dutela bart salatu du Udalbatzan Imanol Landa Getxoko alkateak. Landak galdera eta eskaeren txandan jakinarazi du gertaturikoa, Eusko Abertzale Ekintzak Getxoko ondare historikoari buruz egindako itaunaz baliatuz. Batzokia zikindu izana EAEren "inguruari" leporatu ostean, alderdi ekintzaileri galdetu dio ea ondarea zaintzea babestuta dauden eraikinen aurka margoa botatzea ote den. Landak azaldutakoaren arabera, pintura jaurtiketak atzo gauean egin zituzten, hainbat pertsona manifestazioan Bidebarrieta kaleko egoitzaraino heldu eta jelkideei "torturatzaileak" deitzen dieten esku-orriak bota ondoren. Alkatea batzokiaren barruan zegoen, "bilduta", pintaketak egin zituztenean. Bestalde, Bizkai Buru Batzarrak bart "erasotutako" hainbat batzokiekin bat egin du. Argazkian, 2006ko urriaren 13an ere Areetako batzokiko fatxadara bota zituzten pintura arrautzak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun