Atutxa, Knörr eta Bilbaoren sententziaren kontra bihar Bilbon elkartzera deitu du Eusko Jaurlaritzak
2008ko urt. 25a, 21:52
Eusko Jaurlaritza osatzen duten hiru alderdiek (EAJ, EA eta Ezker Batua) euskal gizarteari dei egin diote "Gure erakundeen alde" lelopean, larunbat honetan, urtarrilak 26, Bilbon egingo den manifestazioan parte hartzera. Euskal gizartearen borondatea "faltsutu" ezin daitekeela adierazi dute ekitaldi horretako hiru deitzaileek. Bihar egingo den manifestazioa Juan Mari Atutxa (argazkian), Gorka Knörr eta Kontxi Bilbaoren aurkako sententziaren harira deitu dute, 18:00etan, Jesusen Bihotzaren plazan eta Juan Jose Ibarretxe lehendakaria bera izango du buru, Eusko Jaurlaritzak ere bat egin baitu deialdiarekin. Ezker abertzaleak, ordea, horrekin bat ez egiteko eskatu du. Martxa hori "egoera berarekin jarraitzeko iruzur" bat dela eta "PSOEk salbuespen egoera ezarri" duela "Euskal Herrian" adierazi du Karmelo Landak. Bitartean, manifestazioaren leloarekin "erabat ados ez" dauden arren, Bilboko martxan parte hartzea erabaki dute Aralarrek "Euskal Herriak pairatzen dituen eraso guztiak salatzeko".Aipatzekoa da, Atutxa auziaren harira, proposamena aurkeztu duela Ezker Batuak, Arabako Batzar Nagusiei "epaileen independentziaren aldeko aldarria" egin dezatela eskatuz. Gasteizko legebiltzarrak, ordea, ez du gaia eztabaidatu ere egin eta erakundeko presidente Izaskun Bilbaok ez du gaiaren gainean txintik ere esan. Bitartean, Herrizaingo sailburu eta Eusko Legebiltzarreko lehendakari ohi Juan Mari Atutxak "justiziarengan inolako konfidantzarik ez" duela adierazi du; baita "orain ere gauza bera" egingo lukeela ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun