Veronica Dominguez gaztearen margolanak egongo dira ikusgai otsailaren 1era arte Sopelan
Veronica Dominguez Sanchez 23 urteko sopeloztarrak bere margolanak izango ditu ikusgai, otsailaren 1era arte, udaletxeko erakusgelan. “Topaketak” izenburupean, artistak lehenengo aldiz bildu ditu azken 11 urteetan eginiko obrak. Artelanetako bati ez ezik, erakusketa osoari ematen dio izena "Topaketak" hitzak, ekimena margo guztien “topaketa delako areto bakar batean”, Dominguezek azaldu duenez. Sopeloztarrak margolanei "hitz egiten" uzten die “pintura diren aldetik, ikuslearen irakurketa eskatzen duten artelan sinboliko-surrealistak baitira”. Artistak elkar bat egiten ez duten gaiak erabili ohi ditu bere koadroetan, ura margoekin nahastuz, olioarekin, koipeekin, “dena, laborategi baten antzera”. Sorkuntza bakoitzaren giltzarri da kolorea, gai bakoitzaren indarra erakusten du eta. Argazkian, Veronica Dominguez gazte sopeloztarra bere artelanetako baten ondoan.
1997an hasi zen margotzen Dominguez, "irudiak sortzearekin batera irudimenezko mundu batera iristeko ematen zion ahalmenak kateatuta". Dario Urzay, Max Erns edo Oscar Dominguez dira bere etorriaren iturri. Lanean hasi aurretik ideia irudikatzen du, formatua aukeratzen du gero eta, hastean, mila aldaketa egiten dizkio artelanari. Artista sopeloztarrak onartzen duenez, pintura oso mundu gogorra da, lan handia egin behar delako, “baina ametsak lortzeko eta zure ogibide izateko, borrokatu behar da”. “Artea, maitatzea da”, bere hitzetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun