Hernio eta Solluberako mendi irteerak antolatu dituzte otsailaren 10erako
2008ko urt. 30a, 16:55
Otsailaren 10erako, igandearekin, irteera bana antolatu dute Sopelako Munarrikolanda eta Plentziako Matrako mendi taldeek. Lehenengoak Gipuzkoako Hernio mendi tontorrera (1.075 metro) igoko dira; bigarrenak, berriz, Bizkaiko Sollube (686 metro) izango dute jomuga. Sopeloztarrek antolatutako txangora joaten interesa daukatenei 696 731 662 telefono zenbakira deituz emango zaizkie xehetasunak. Hurrengo bi ostegunetan egongo da izena emateko aukera, 20:00etatik 21:30era. Bestalde, plentziarrekin mendira joan nahi dutenek otsailaren 5a baino lehen izena eman beharko dute, Goñi Portan kultur etxean, 10:00etatik 13:00etara edota 17:00etatik 19:00etara. 5 euro ordaindu beharko dituzte. Horrenbestez, igande horretan, goizeko 8:30ean abiatuko dira Plentziako metro geltokitik. Argazkian, Munarrikolandako mendizaleek igaz Autzara (Nafarroa) egindako irteera.Munarrikolanda mendi taldeak antolatutako txangoa Hernialde herrian hasiko da. Lizarbakarrera heldu artekoa izango da lehen malda, handik Herniozabalera helduko dira. Beratik Tolosa eta Aleiza herrixka ikusten dira. Uraitz (1.018 metro) eta Mako (1.066 metro) mendietatik jarraituko du ibilaldiak Hernio tontorrera iritsiz (1.075 metro). Iturriotz (580 metro) zeharkatuz jaitsiko dira eta Loiolako Inaziok lo egin ei zuen benta ospetsua ezagutzeko aukera izango dute. Zeharkaldia egiteko bost ordu behar dira, gutxi gora behera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun