Klaustroa "normaltasunez" biltzeko "behar ziren neurriak" hartu dituela dio EHUk

Klaustroko batzarrera "indarrez" sartu nahi izatea egotzi die, Bolognako prozesuaren aurka, Leioa eta Erandioko campuseko Areto Nagusiaren kanpoaldean protesta egin duten "30 bat ikasleei", Euskal Herriko Unibertsitateko (EHU) Errektoregoak. Hartara, aurreko batzarrean gertatutakoa gogora ekarri dute EHUko arduradunek: "joan den abenduan Klaustroko bilera eten egin behar izan zen, aretoa ikasle talde handi batek hartu zuelako. Unibertsitateak gaitzetsi egin zuen gertaera hura, eta aurrerantzean behar ziren neurriak hartuko zirela ere esan zuen, tankera horretako gorabeherarik berriro gerta ez zedin", adierazi dute komunikabideei helarazitako oharraren bidez. Gaurko batzarra "normaltasunez" egin ahal izan bada, "segurtasun zerbitzukoei esker" eta "Ertzaintzaren laguntzaz" izan dela gaineratu dute; baita protesta egin duten ikasleen jarrera "nabarmen bortxazkotzat" jo ere. Argazkian, abenduko irudietako bat / Gaztesarea.