Gabonetan izandako hainbat txikizioen bitartez, zenbaitzu berezi eta kuttun diren egunak mikazten saiatu" zirela eman du jakitera bi hilabete igarota Sopelako Udalak. Abenduaren 26an, asteazkena, Iturrietako parkean dauden hainbat kale altzari apurtzeari ekin zioten. Hain justu ere, Sabino Arana kalean dauden zenbait farola puskatu zituzten, seguruenik petardoekin, tokiko agintariek zehaztutakoaren arabera. Horretaz gain, hurrengo egunean, ostegunean, parke bereko paperontzi bat lehertuta agertu zen, hori ere materiale piroteknikoaren bidez. "Herritar gehienak urte zaharreko ospakizunetan buru lepo zebiltzanean, 2008ari ongietorri egiten, beste zenbaitzuk txikizioekin jarraitu zuten", jarraitu dute udal arduradunek. Beste bost paper ontzi hondatu zituzten, farola baten goiko aldea eta haurrentzako bi jostatoki. Gabon garaian izandako txikizio guztiak konpontzeko 50.000 eta 60.000 euro artean gastatu beharko dituztela diote.
"Aipatutako txikizioez gain, iturri ondokoak izan ziren aipagarrienak, koadro elektrikoari eraso egin baitzioten, hodien sistema osoari eraginez. Hori guztia nahikoa ez bazen, iturri ondoko harrizko lauzatxoak suntsitu zituzten eta iturri barruan bi lore ontzi aurkitu zituzten", nabarmendu dute udal iturriiek. Baina Iturrieta parketik landa, Bentatxu kalean ere hainbat paperontzi apurtuta agertu zirela salatu zuen auzotar batek, urtarrilaren 1ean. Urko kiroldegian, berriz, tabernako janari makina "saboteatuta" agertu zen. Bestalde, urtarrilaren 2an, Iberre kaleko koadro elektrikoa, farolak eta paperontziak apurtu zituztela adierazi du Sopelako Udalak. Errege egunean ere udaletxe inguruko suteetarako ur zuloa bat ere txikituta agertu zen; baita Iturrieta parkeko hainbat farola eta paperontzi berriro ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun