Besteak beste, Berria eta Gara egunkarietan izan du oihartzuna, Anjel kalera! herri ekimenak deituta, hainbat lagunek larunbat eguerdian Gasteizko Txagorritxu erietxearen aurrean egindako elkarretaratzea, euren herrikide Anjel Figueroa preso gaixo algortarra aska dezatela aldarrikatzeko. Goizeko 11:00ak aldera kotxe karabana irten zen Algortatik, eta 12:30ak inguru eman zioten hasiera kontzentrazioari ospitalaren aurrealdean. “Anjel askatu! Preso gaixoak kalera” lelopean egin zuten mobilizazioa, eta Figueroak ospitaleko leiho txiki batetik agurtu ahal izan zituen bertan bildutakoak. Azken egunetan hainbat eta hainbat mobilizazio egin dituzte algortarraren askatasuna galdegiteko, bere osasun egoera txarra dela-eta. Horrenbestez, sinadurak biltzen jarraitzen du Anjel kalera! herri ekimenak. Besteak beste, Algortako Tellagorri plazan (argazkian) jarri zuten mahaia urtarrilaren 26an.
Hilabetea Txagorritxun eman eta joan den aste bukaeran Langraitzera bueltatu ostean, espetxean lau krisialdi sufritu eta gero, astelehenean ospitaleratu zuten berriro Figueroa. Algortarrak gaixotasun kroniko eta sendaezina du: epilepsia tenporala eta eskuinaldeko esklerosi mesiala, hain zuzen. Gainera, ezkerraldeko lobulu tenporalean beste foku bat duela antzeman diote orain hilabete batzuk.Horren ondorioz krisialdi epileptiko larriak izaten ditu, krisialdi horietan konortea galtzen du, eta tartean absentziak, memoria galerak eta haluzinazioak ere izaten ditu. Horrenbestez, Anjel kalera! herri ekimena abiatu zuten azaroaren 17an 50 bat algortarrek, euren auzokideari Kode Penalaren 92. artikulua aplikatu eta espetxetik atera dezatela eskatzeko asmoz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun