Getxoko Udal Gobernu Batzordeak Sahararen Aldeko IV. Euskal Karabanarako 18.000 euroko diru-laguntza ematea erabaki du, kamioi eta atoi bat erosteko hain zuzen ere; otsailaren 16an Bilbotik aterako den karabanan azken bi hilabetetan bildutako lehen mailako produktuak eramatera joateko. Karabana Aljerian dauden saharar errefuxiatuen kanpamentuetara joango da. "Diru-laguntzaren helburuak Atfal Getxoko Sahararen aldeko elkarteak udalerrian aurrera eraman duen jakien bilketarekin kolaboratzea, udalerrian saharar herriaren alde egiten diren ekimenekin bat egitea eta Udalak Sahararekin duen konpromisoan beste urrats bat ematea dira", Imanol Landa alkateak gaurko prentsaurrekoan azaldu duenez. Horrela, Getxo udalerrian lehen mailako 8.500 kilo produktu batu dira, atuna oliotan, azukrea, arroza, dilistak eta konpresak, besteak beste; Udalarekin, 16 ikastetxerekin, jaki dendekin eta hainbat banketxeekin elkarlanean. Argazkian, elikagaiak eramateko Euskal Karabanak erabiltzen duen kamioietako bat.
Jakien bilketak jaitsiera txiki bat izan du, batutako kopuruei dagokionez, Euskal Autonomia Erkidegoan (EAE) eta horrek udalerrian 500 kilo gutxiago batu izana ekarri du, baina kanpainako arduradunek ez dute hori oso garrantzitsutzat jo, "jaitsiera ez delako oso handia izan eta normala delako urte batzuetan gehiago eta beste batzuetan gutxiago biltzea". Edozein modutan ere, Julio San Roman Atfal elkarteko bozeramailearen arabera, "karabana antolatzen segitzea oso beharrezkoa da, saharar herriak bizi duen egoera larriagatik; baita bere eskubideak aldarrikatzeko beharragatik ere".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun